Bakunews-a daxil olan şikayət əsasında məlum olub ki, 176 nömrəli marşrut xətti ilə (Sədərək–Novxanı, poçtun yanı istiqaməti) hərəkət edən avtobusun sürücüsü sərnişinlərə qarşı kobud davranış nümayiş etdirib.

Sərnişinlərin sözlərinə görə, hadisə Binəqədi şəhərciyi ərazisində baş verib. Belə ki, sürücü marşrutu son dayanacağa qədər davam etdirmək əvəzinə avtobusu saxlayaraq sərnişinlərdən düşməyi tələb edib.

Sərnişinlər isə marşrutun rəsmi olaraq son dayanacağının Novxanı qəsəbəsində, poçtun yaxınlığı olduğunu bildirərək ünvana çatdırılmalarını tələb ediblər. Lakin bu zaman sürücünün reaksiyası daha da sərtləşib.

İddialara görə, sürücü:

> “Avtobus mənimdir, gedin kimə istəyirsiniz şikayət edin, mənim kefim belə istəyir”



– kimi ifadələrlə qanunvericiliyə açıq şəkildə meydan oxuyub.

Redaksiyamıza təqdim olunan görüntülərdən də aydın görünür ki, sürücü sərnişinlərlə kobud və etik normalara zidd şəkildə davranır.

Şikayətçilər aidiyyəti qurumlardan məsələni araşdırmağı, sürücünün davranışına hüquqi qiymət verilməsini və belə halların təkrar yaşanmaması üçün ciddi tədbirlər görülməsini xahiş edirlər.

Qeyd edək ki, ictimai nəqliyyatda sərnişinlərin mənzil başına təhlükəsiz və müəyyən olunmuş marşrut üzrə çatdırılması qanunvericiliklə tənzimlənir və sürücülərin bu qaydaları pozması yolverilməz hesab olunur.

Həmin görüntüləri təqdim edirik.