Ötən gün gecə saatlarında Cəlilabadda sürücünün ölümü ilə nəticələnən yol nəqliyyat hadisəsi baş verib.
BakuNews.az-ın yerli bürosunun məlumatına görə, hadisə köhnə Ələt-Astara magistralının 147 km-də rayonun Göytəpə şəhəri ərazisində qeydə alınıb.
Eyni istiqamətdə hərəkətdə olan, Elbəyi Adıgözəlovun idarə etdiyi "VAZ 2107" markalı minik avtomobili, Tural Həsənovun idarə etdiyi "Mitsubishi" markalı minik avtomobili ilə toqquşub. Zərbənin təsirindən "VAZ 2107" markalı nəqliyyat vasitəsi elektrik dirəyinə çırpılaraq, aşıb. "Mitsubishi" markalı nəqliyyat vasitəsi isə yol kənarındakı ağacın üstünə uçub və ağacdan asılı vəziyyətdə qalıb. Qəza nəticəsində "Jiqulinin" sürücüsü, Cəlilabad rayonun Maşlıq kənd sakini, Elbəyi Adıgözəlov aldığı xəsarətlərdən ölüb.
Hadisə yerinə FHN xüsusi riskli xilasetmə qüvvələri cəlb olunub və xilasedicilər xüsusi avadanlıqlar vasitəsilə meyiti deformasiyaya uğrayan nəqliyyat vasitəsindən çıxarıblar. "Mitsubishi" markalı avtomobil ağır texnika vasitəsilə ağacdan götürülüb.
Xəsarət alan sürücü Tural Həsənov da xəstəxanaya yerləşdirilib.
İlkin versiya kimi, qəzanın baş verməsinə səbəb VAZ-2107 markalı nəqliyyat vasitəsinin sürücüsünün ötmə əməliyyatını düzgün yerinə yetirməməsi bildirilir.
Qeyd edək ki, sürücü hadisədən bir qədər sonra xəstəxanaya müraciət edib.
Faktla bağlı araşdırma aparılır.