"OpenAI" şirkəti "Apple"ın keçmiş baş dizayneri Coni Ayv ilə birlikdə süni intellekt əsaslı yeni cihaz üzərində işləyir. Layihənin təfərrüatları gizli saxlanılsa da, məlum olub ki, şirkət məhsulun bazara çıxarılmasından əvvəl bir sıra texniki məsələləri həll etməlidir.

Valyuta.az "Financial Times"a istinadən xəbər verir ki, əsas çətinliklərdən biri cihazın funksional xarakterini və istifadəçi ilə qarşılıqlı əlaqə tezliyini müəyyənləşdirməkdir. Mənbələrin sözlərinə görə, konsepsiya "qəribə süni intellekt sevgilisi"nə çevrilmədən istifadəçi üçün “dost-kompüter” yaratmaqdan ibarətdir.

Yeni cihaz təxminən smartfon ölçüsündə olacaq, lakin ekranı olmayacaq. Onu həm cibdə daşımaq, həm də masa üzərində saxlamaq mümkün olacaq. Qurğu mikrofon, dinamika və kamera vasitəsilə istifadəçi ilə əlaqə quracaq.

Bu, Coni Ayv və Sem Altmanın birgə hazırladığı cihazlar seriyasının ilk modeli sayılır. Onun satışa çıxarılması 2026-cı ilin sonuna və ya 2027-ci ilin əvvəlinə planlaşdırılır.

"OpenAI" cihazı "Siri"yə bənzər, lakin daha inkişaf etmiş şəkildə təqdim etməyi hədəfləyir. Şirkət hazırda səs tonunu, ünsiyyət tərzini və qurğunun danışığı nə vaxt başlamalı, nə vaxt isə dayandırmalı olduğunu təyin edən sistem üzərində işləyir.

Mənbələr bildirir ki, cihaz “həmişə aktiv” rejimdə fəaliyyət göstərəcək və yalnız səs əmri ilə deyil, gün ərzində istifadəçi haqqında məlumat toplayacaq.

Paşa Məmmədli