Ədəbiyyat İnstitutunun baş mütəxəssisi orta məktəb üçün himnin sözlərinin müəllifidir.
AMEA-nın Nizami Gəncəvi adına Ədəbiyyat İnstitutunun “Elektron xidmətlər” şöbəsinin baş mütəxəssisi Zərifə Qasımova məzunu olduğu Xətai rayonundakı 64 saylı tam orta məktəbin himninin sözlərinin müəllifidir. “64 saylı məktəbin himni” adlı əsərin musiqisi həmin təhsil müəssisəsinin müəllimi Mətanət Tomayevaya məxsusdur.
Məktəbin jurnalında verilən məlumata görə, təhsil ocağının yaradılmasının 100 illiyi ilə əlaqədar bu ilin aprel ayında geniş yubiley tədbirinin keçirilməsi planlaşdırılır. Zərifə Qasımovanın adı jurnalın “Seçilmiş məzunlar” bölməsində də yer alıb.
Qeyd edək ki, Zərifə Qasımova 1996-cı ildə 64 saylı məktəbi müvəffəqiyyətlə bitirib. O, Azərbaycan İctimai-Siyasi Universiteti və Naxçıvan Dövlət Universitetində bakalavr, Odlar Yurdu Universitetində isə magistr təhsili alıb. 2018-ci ildən Nizami Gəncəvi adına Ədəbiyyat İnstitutunun “Elmi informasiya və tərcümə” şöbəsində baş mütəxəssis kimi fəaliyyət göstərir.
Azərbaycan Yazıçılar Birliyinin üzvü olan Zərifə Qasımova “Çiyələk qoxusu” (“Запах клубники”) və “Sehr lələyi” (“Перо Волшебства”) adlı şeir kitablarının, eləcə də bir sıra elmi məqalə və tezislərin müəllifidir.