7 mart tarixində Xətai Sənət Mərkəzi-də rəssam və modelyer-dizayner Lalə Cəbrayılova-nın təşəbbüsü və təşkilatçılığı ilə “Milli-mənəvi dəyərlərimiz” adlı incəsənət sərgisi və moda nümayişi keçirilib.

Layihənin müəllifi və təşkilatçısı Lalə Cəbrayılova tərəfindən ərsəyə gətirilən tədbirin əsas məqsədi Azərbaycan xalqının zəngin milli-mənəvi dəyərlərini incəsənət vasitəsilə təqdim etmək, yaradıcı insanlara dəstək olmaq və milli irsin təbliğinə töhfə verməkdir.

Tədbir Azərbaycan Respublikasının Dövlət Himninin səsləndirilməsi ilə başlayıb. Açılış nitqlərində vurğulanıb ki, milli-mənəvi dəyərlər hər bir xalqın kimliyini formalaşdıran, onun tarixini və mədəniyyətini yaşadan ən mühüm amillərdəndir.

Tədbir çərçivəsində həm tanınmış, həm də gənc rəssamların milli mövzuda hazırladıqları rəsm əsərləri sərgilənib. Bununla yanaşı, modelyerlərin milli motivlərdən ilhamlanaraq hazırladıqları geyim kolleksiyalarının moda nümayişi keçirilib. Nümayiş olunan kolleksiyalar Azərbaycan mədəniyyətinin estetik xüsusiyyətlərini, milli ornamentləri və ənənəvi elementləri özündə əks etdirib.

Sərgidə təqdim olunan əsərləri qiymətləndirmək üçün müstəqil münsiflər heyəti fəaliyyət göstərib. Münsiflər heyətinin tərkibində:

- Nəzakət Əvəzova – Xətai Sənət Mərkəzinin direktor müavini
- Validə Hüseynova
– Turban Moda brendinin rəhbəri, modelyer
Mina Məmmədova – rəssam
- Nuranə Fətullayeva – Elm və Tədris Mərkəzinin direktoru
yer alıblar.

Proqram çərçivəsində musiqi və rəqs nömrələri təqdim olunaraq tədbir iştirakçılarına xoş anlar yaşadılıb.

Sərgi çərçivəsində keçirilən müsabiqənin nəticələrinə əsasən qaliblər aşağıdakı kimi müəyyənləşdirilib:

Rəssamlar arasında (böyük yaş kateqoriyası):

🥉 III yer – Rəmziyyə Babayeva
🥈 II yer – Ayşən Qasımova
🥇 I yer – Leyla Vahidova

Modelyerlər arasında:

🥉 III yer – Naibə Mirzəliyeva
🥈 II yer – Nuranə Həsənova
🥇 I yer – Xəyalə Məsimova

Tədbirin sonunda sertifikat və diplomların təqdim olunma mərasimi keçirilib. Qaliblərə diplom və mükafatlar layihənin müəllifi və təşkilatçısı Lalə Cəbrayılova tərəfindən təqdim edilib. Digər iştirakçılara və gənc həvəskar rəssamlara isə sertifikatlar verilib.
Qeyd olunub ki, Lalə Cəbrayılovanın təşəbbüsü ilə həyata keçirilən bu layihə milli-mənəvi dəyərlərin incəsənət vasitəsilə təbliği, yaradıcı insanların dəstəklənməsi və Azərbaycan mədəniyyətinin geniş auditoriyaya təqdim olunması baxımından mühüm əhəmiyyət daşıyır.

Hazırladı: Zeynəb Seyidqızı