Bu ilin əvvəlində elan edilən yeni sosial islahat paketi çərçivəsində pensiyaların artırılması ilə bağlı vədlər verilsə də, hələ də milyonlarla pensiyaçının gözləntiləri yerinə yetirilməyib.

Bakunews.az: Yanvarın 28-də keçirilən Kollegiya iclasında Əmək və Əhalinin Sosial Müdafiəsi Nazirliyi fevral ayından etibarən bütün pensiyaların artırılmış məbləğdə ödəniləcəyini bildirmişdi. Artım iki istiqamətdə nəzərdə tutulurdu:

1. Pensiyaların indeksləşdirilərək artırılması

2. 320 manatdan aşağı olan pensiyaların 320 manata çatdırılması



Nazir Sahil Babayev də həmin iclasda çıxış edərək, Prezident İlham Əliyevin tapşırıqları əsasında həyata keçirilən sosial islahatların pensiyaçılar üçün daha yaxşı nəticələr doğuracağını vəd etmişdi. Qeyd edilmişdi ki, 2018-ci ildən bəri sosial paketlər çərçivəsində minimum pensiya 3 dəfə, orta aylıq pensiya isə 2,4 dəfə artırılıb. Bununla yanaşı, pensiya ödənişləri üçün ayrılan illik vəsaitin 7,2 milyard manata çatdığı açıqlanmışdı.

Lakin bu açıqlamaların üstündən 3 ay keçsə də, pensiya artımı ilə bağlı real addımların atıldığı görünmür. Mart ayına qədər pensiyaçılar gözləsə də, nə indeksləşdirmə həyata keçirilib, nə də 320 manatdan aşağı pensiyaların artırılması ilə bağlı konkret addım atılıb.

Gözlənilən artım niyə həyata keçirilmir?

Rəsmi qurumlar bu məsələyə açıq cavab vermir. Əksinə, ictimaiyyətdə yaranan narazılıqların fonunda məsələ ilə bağlı hər hansı açıqlama verilməməsi, artım vədlərinin sadəcə nəzəriyyədə qaldığı fikrini gücləndirir. Bəzi ekspertlər hesab edir ki, pensiya fonduna ayrılan vəsaitlərin bölgüsü və artım məsələsi hökumət üçün əlavə maliyyə yükü yarada bilər və buna görə də proses uzanır.

Digər tərəfdən, Nazirliyin hesabatlarında göstərilən rəqəmlər və verilən vədlərlə real vəziyyət arasında ciddi uyğunsuzluq var. Rəsmi məlumatlara görə, 2024-cü ildə Dövlət Sosial Müdafiə Fondunun gəlirləri 345 milyon manat (5%) artıb, pensiya və sosial ödənişlər üçün ayrılan məbləğ isə 8,8 milyard manata çatıb. Bu qədər vəsaitin ayrıldığı bildirilirsə, niyə pensiyaçılar hələ də vəd edilən artımları ala bilmir?

Pensiyaçılar haqlı olaraq narazıdır

Gözləntilər qarşılanmadığından pensiyaçılar arasında narazılıq artır. Məsələ təkcə maddi gəlirin az olması deyil, eyni zamanda hökumətin verdiyi vədlərin yerinə yetirilməməsidir. Ölkədə qiymət artımları fonunda pensiyaçılar üçün bu artımlar həyati əhəmiyyət daşıyırdı.

İndi əsas sual budur: pensiya artımı ilə bağlı verilən vədlər nə zaman reallığa çevriləcək? Nazirlik və hökumət rəsmilərinin bu məsələyə aydınlıq gətirməsi və pensiyaçılara konkret cavab verməsi gözlənilir. Əks halda, vədlərin yerinə yetirilməməsi hökumətə olan ictimai inamın daha da azalmasına səbəb ola bilər.

M.Seyidoğlu