Elementar paxıllıq, kin, küdurət və üstəlik də xəyanətin simbiozu özünü savadlı, təcrübəli və adekvat hesab edən insanların şüurunu belə, zəhərləyir. Sadalananlar yaşandıqda həmin insan potensial, hətta real hədəf seçdiyi subyektə qarşı kiçik dünyasında hücuma keçir, məqsədə çatmaq üçün özünü satışa çıxarır.


Bəşər tarixi göstərir ki, belə hallarda satılanın qiyməti çox ucuz olur və xəyanətə ödənən məbləğlər sərf edilən emosiyalarla zəhmətə bərabər olmur.

Amma xəyanətkar artıq işindədir və o, tədricən agentə çevrilir.

Azərbaycanın son illərdəki siyasi, diplomatik, geosiyasi və hərbi uğurları, xüsusilə də Vətən Müharibəsindən sonra Cənubi Qafqazda geosiyasi reallıqların dəyişməsi təbii ki, bölgədəki bəzi dövlətləri çox narahat edir.

Belə dövlətlər arasında şübhəsiz ki, ilk yerdə məğlub Ermənistan və təəsüflər olsun ki, illüzor geosiyasi dividentlər naminə ermənilərə öz "qırmızı cizgilər"i ilə ürək-dirək verən İran var.

Yaranmış vəziyyətdən bəhrələnməyə can atan agentlər isə, "sine dubio", İranla Ermənistanın maraqlarını təmin etmək üçün fəallaşıblar.

Onlardan biri haqqında bəhs edək.

... "Avropa İttifaqının fəaliyyəti əsasən Azərbayanla Ermənistana "səbrli və təmkinli olmaq"la bağlı çağırışlardan ibarətdir. Aİ üzvü olan Fransa təki bəzi dövlətlər Qafqazda daha fəal rol oynamaq istərdilər. Amma sərt güc olmadan bu, həddən ziyadə çətindir. Mümkün variant qismində ATƏT bayrağı altında Qarabağda gücün vardığı mümkün ola bilərdi. Lakin bunun üçün Qərb dövlətlərinin Rusiya ilə əməkdaşlığı, habelə avropalıların bölgəyə sülhməramlı yollamaq istəyi gərəkdir.

Hələlik bu şərtlərin heç birinin yerinə yetirilməsi real görünmür".

... Mövcud geosiyasi reallıqlarla yanaşı, faktları və ən başlıcası, dövlətlərin mənafeləri ilə beynəlxalq hüququ nəzərə almayan bu açıqlama erməniyə, yaxud Azərbaycana qarşı kəskin düşmənçilik mövqe tutan şəxsə məxsus sayıla bilər.

Belədir, amma həm də belə deyil.

Müəllifin soyadı "yan"la bitmir və o, erməni deyil.

Azərbaycan ərazisinə "ATƏT gücü" adı altında beynəlxalq kontingentin yeridilməsini və bu minvalla qarabağlı ermənilərin "hüquqlarının qorunması"nı təklif edən şəxs Eldar Məmmədovdur.

Latviya vətəndaşıdır. Dediyinə görə, latış, ingilis, eston və rus dillərini əla bilir.

Latviya Universitetində, daha sonra Madriddəki Diplomatiya Məktəbində təhsil alıb. Latviya XİN-in əməkdaşı olub, bu ölkənin ABŞ və İspaniyadakı səfirliklərində çalışıb.

2007-ci ildən bəri Avropa Parlamentinin xarici işlər üzrə komitəsində sosial-demokratların siyasi müşaviridir. Eyni zamanda, Avropa Parlamenti ilə İran, İraq, Ərəbistan Yarımadası və Şimali Afrika ölkələri arasında parlamentlərarası nümayəndə heyətinə başçılıq edir.

Bu "təcrübəli diplomat" Fridrix Ebert Fondunun nəşri olan "Beynəlxalq Siyasət və Cəmiyyət" (International Politics and Society, İPS) jurnalında dərc olunmuş "Dağlıq Qarabağı niyə unutmamalıyıq" (Why Nagorno-Karabakh shouldn't be forgotten) başlıqlı məqaləsində faktları dezinformasiya, gerçəkləri illüziya, mövqeni isə nifrət və iddialarla əvəzləyərək öz aləmində "Azərbaycan üzərinə hücum"a keçib.

Müəllif yazır: "Beləliklə, Azərbaycanla Ermənistan arasındakı fərqin azaldılması dayanıqlı sülhün əldə edilməsinin yeganə real yoludur. Bunun üçün Ermənistan müdafiə imkanlarını əhəmiyyətli dərəcədə modernləşdirməlidir. Məqsədə çatmaq üçün milli məqsəd ətrafında birləşmiş dövlətin daha az parçalanması, zaman və sərmayələr gərəkdir.

Azərbaycandan isə güzəştlərə getmək tələb olunur. Azərbaycan cəmiyyətində indi müharibədən yorğunluq müşahidə olunur, İkinci Qarabağ Müharibəsindəki qələbə ilə bağlı eyforiya azalır və yerini sosial-iqtisadi problemlərin yaratdığı narazılıq əvəzləyir. Rəsmi Bakının triumfal narrativlərinin əsası yoxdur. Bununla belə, qısamüddətli perspektivdə sülh ehtimalı azdır, çünki geosiyasi küləklərin əsirliyində olan rəsmi Bakı istənilən real diplomatiyanın zərərinə olaraq güc üstünlüyündən istifadə etməyə davam edəcək".



Göründüyü kimi, Eldar Məmmədov ölkəmizə "ermənilərlə dil tapmağı" məsləhət görür. Yəni Azərbaycan xalqı və dövləti 44 günlük İkinci Qarabağ Müharibəsindəki zəfərindən faktiki olaraq imtina etməli, hələlik müvəqqəti olaraq rusiyalı sülhməramlıların operativ-nəzarət arealında olan ərazilərdəki ermənilərin "maraq və mənafelərini bütünlüklə nəzərə almalı"dır.

Bu nə deməkdir?

Eldar Məmmədovun fikrincə, rəsmi Bakı Xankəndindəki terrorçu rejimi "tanımalı", Şuşanı və Hadrutu ermənilərə "qaytarmalı", İrəvanla Xankəndi arasında fasiləsiz və maneəsiz əlaqə üçün Laçın rayonunu praktiki qaydada ermənilərin nəzarətinə verməli, ən nəhayət, Azərbaycanın Xankəndi, Ağdərə, Əsgəran, Xocalı və s. kimi Rusiya sülhməramlı kontingentinin müvəqqəti kontrolundakı ərazilərdə ermənilərin "silahlı birləşmələri" adlanan terrorçu qrupların mövcudluğu ilə "barışmalıyıq".

Sadalananlar kollaborasionizm, təslimçilik yox, xəyanətdir və Azərbaycanın belə idiotik şərtlərlə razılaşacığın xəyal etmək belə, siyasi debilizm səviyyəsində olan davranışdır.

Fəqət Eldar Məmmədov primitiv düşüncəli, bisavad və təcrübəsiz adam deyil.

Tam əksinə, o, qarşısına qoyduğu məqsədlərə çatmaq üçün heç nədən çəkinməyən fərd, mənəviyyatsızlığı "rasionallıq", siyasi əxlaqsızlığı "praqmatizm", xəyanəti isə "situativ davranış" hesab edən, onu ləyaqətdən kənar əməldə ittiham edənlər isə imbesiz sayan yaramazdır.

Qayıdaq Eldar Mamedova, yəni Eldar Məmmədova.

1972-ci ilin dekabrın 13-də Latviyanın paytaxtı Riqada doğulmuş bu fərd bank sektorunda da işləyib, hətta "Parex Bank"ın Azərbaycandakı bölməsinin rəhbəri də olub.

Hazırda Brüsseldə yaşayan E.Məmmədov indi Avropa Parlamentinin latviyalı deputatı Andris Ameriksin köməkçisi olan Natalya Sısoyevanı boşayandan sonra de-yure "subay"dır, amma de-fakto eyni zamanda iki məşuqəsilə növbələşərək "qeyri-rəsmi nikah"dadır.

İPS-də dərc olunmuş məqalə Eldar Məmmədovun 13 ildən bəri Azərbaycana qarşı yönəlmiş fəaliyyətinin sadəcə, bir epizodudur.

Məsələn, hələ 2010-cu ildə o, "Hurriyet daily news"da güya "insan hüquqlarının müdafiəsi" müstəvisində "Türkiyə və Azərbaycanda azadlığın qara günləri" başlıqlı məqalə dərc etdirərək rəsmi Bakı ilə Ankaraya qarşı absurd ittihamlar irəli sürmüşdü.

Və ya başqa misal: 2020-ci ilin oktyabrın 2-də E.Məmmədovun "The American Conservative"da dərc olunmuş yazısında erməni işğalındakı ərazilərimizin azad edilməsinə yönəlmiş hərbi əməliyyatları "Azərbaycanın qəddar hücumu" adlandırılmışdı. Həmin yazıda ermənilərin "Azərbaycan ordusunun tərkibində suriyalı muzdlular da vuruşur" tezisi çox geniş şəkildə "inkişaf etdirilmişdi".

"Siyasi analitik", "siyasi müşavir", "peşəkar diplomat" və s. qismində özünü təqdim edən Eldar Məmmədov sadəcə, Ermənistana xidmət etmir.

O, artıq 15 ildir ki, İran İslam Respublikasının "əlahiddə maraq"larının keşiyində durur.





E.Məmmədovun İrana çalışmasının təməli 2007-ci ilin 22-25 iyun günlərində, onun İrana səfəri əsnasında qoyulub.

Bu adamı hələ Latviyanın XİN-də çalışdığı dönəmdə diqqətlə izləməyə başlamış İranın xüsusi xidmət strukturları Tehranda E.Məmmədovla "mübhəm müzakirə"lər apararaq onu faktiki olaraq ələ almağa nail olublar.

Məsələn, fasiləsiz olaraq "qatı liberalam, demokratam və sosialistəm" deyən E.Məmədov məntiqlə, İrandakı teokratik hakimiyyətin sərt əleyhdarı olmalıdır.

Lakin vəziyyət tam əksinədir - Eldar Məmmədov İranın Belçikadakı səfirliyinin daimi qonağıdır.

Bəhs etdiyimiz məqamlara görə, E.Məmmədovun aşkar "İran sevgisi"nə təccüblənmək gərək deyil.




Məsələn, İsrailin Azərbaycandakı səfiri Corc Dikin Təbrizlə bağlı sosial şəbəkələrdəki məşhur fləşmobuna cavab olaraq E.Məmmədov dahi şairimiz Nizami Gəncəvinin "fars mənşəyi" barədə Twitter-dəki akkauntunda paylaşım etmişdi.

İranın Brüsseldəki səfirliyinin Avropa Parlamentində Tehrana lobbiçilik etməyi Eldar Məmmədova həvalə etməsi də məhz buna görə rutin qərar sayıla bilər.

E.Məmmədov hazırda rəsmi Tehranla Avropadakı beynəlxalq siyasi araşdırma və təhlil mərkəzləri, fondları, cəmiyyətləri arasında vasitəçi rolunda çıxış edir.

Məsələn, bir müddət əvvəl o, Brüsseldəki Konrad Adenauer Fondunda iranlı və avropalı siyasətçilərlə ekspertlərin qapalı müzakirəsini təşkil etmişdi.

Eyni zamanda o, Avropa mediasında bilavasitə İran İslam Respublikasının maraqlarına xidmət edən yazılar və şərhlərlə çıxış edir, Qərbi İranla yeni əlaqələr qurmağa, İranın şərtləri əsasında "nüvə sövdələşməsi"ni reallaşdırmağa çağırır.

Bütün bunlarla yanaşı, o, əsas hədəfinin Azərbaycan olduğunu da gizlətmir.

Məsələn, 2021-ci ilin mayın 27-də İPS-də dərc olunmuş "Azərbaycanda niyə İsraili tənqid etmirlər?" məqaləsində o, Tehranın "Azərbaycanda İsrailin kəşfiyyat fəalliyyətinə imkanlar yaradır" tezisini Amazoniya kakadusu təki təkrarlamışdı.

2020-ci ilin iyulun 22-də dərc olunmuş "Responsible Statecraft" yazısında isə o, Azərbaycanı "bölgədən kənar dövlətlərin İraqa qarşı yönəlmiş proqramlarında yer almaq"da suçlamışdı.





Sanki həmin məqalə İrandakı bəlli mürtəce mollalardan və ya SEPAH generallarından birinin çıxışından iqtibaslar idi.

Eldar Məmmədov erməni "hami"lərinə xidməti də unutmur.

Məsələn o, Avropa İttifaqının Rusiyanın təbii qazına ciddi alternativ qismində Azərbaycandan alınacaq "mavi yanacağa" stavka etməsini ciddi səhv adlandırıb.

Tehrandakı bəlli strukturlarla yanaşı, ermənilərdən aldığı göstərişləri yerinə yetirən, bunu maliyyə "yardım"ları müqabilində edən Eldar Məmmədov fəaliyyətini genişləndirmək niyyətindədir.

Trivial deyim var - "iştah diş altındadır".

Görünür, alınan məbləğlər Eldar Məmmədova artıq az gəlir.\\milli.az

bakunews.az

Məqaləyə dair fotomateriallar: