Uşaq bağçaları və körpələr evlərində neqativ halların xeyli artması ciddi addımların atılması zərurətini yaratmışdı. Məhz bu səbəbdən məktəbəqədər tədris müəssisələrinə qəbulun online qaydada aparılması barədə qərar verildi. Üstəlik sözügedən müəssisələr Prezident İlham Əliyevin sərəncamına əsasən, İcra Hakimiyyətilərinin balansından alınıb, Elm və Təhsil Nazirliyinin tabeliyinə verildi.

Ancaq təəssüf ki, bəzi uşaq bağçaları bu dəyişikliklərdən sonra da öz fəaliyyətlərində dönüş yaratmayıblar. Götürək elə Sumqayıt şəhərindəki 26 saylı körpələr evi-uşaq bağçasını. Burada yalnız müdir Sidqiyyə Xıdırovanın qanunları işləyir. Onun rəhbərlik etdiyi bağçanın fəaliyyəti ilə bağlı saytımıza edilən şikayət dolu müraciətlər belə deməyə əsas verir. Belə ki, formal olaraq azyaşlı uşaqlar online qaydada növbəyə götürülsələr də, vaxt yetişəndə köhnə qaydalar işə düşür. Yəni, sənədlərinizi gətirin, arasında da 500 AZN...

Yazıda adı çəkilənlərin mövqeyini tanıyırıq. Tanınan mövqedən çıxış etmək istəməyən direktor əlacı valideynə təzyiq göstərməkdə görüb deyə mediada xəbər yayılıb. Xezertv.info xəbər verir ki, 4 aprel 2025-ci il tarixində “Sumqayıtdakı 26 saylı bağçada nələr baş verir?” sərlövhəli yazımız dərc olunmuşdu. Həmin yazıda bağçanın müdiri Sidqiyyə Xıdırovanın qanunsuz və korrupsiya əməlləri barədə məlumat verilmişdi. Şikayətçinin adı redaksiyamız tərəfindən gizli saxlanmasına baxmayaraq, görünür, Sidqiyyə Xıdırova məsələyə fərqli yanaşıb – “Qara məni basmamış, qoy qaranı mən basım” prinsipini əsas tutaraq 21 aprel 2025-ci il tarixində həmin valideyni otağına çağırıb.

Məlumatlara görə, o, otaqda bir neçə əməkdaşı və digər valideynlərin iştirakı ilə psixoloji təzyiq yolu ilə valideyndən “şikayətçi olmadığını” bildirən ərizə yazmasını tələb edib. Təəssüf ki, bu da son deyil.

İddiaya görə, Sidqiyyə Xıdırova valideynə açıq şəkildə belə bir şərt qoyub: “Əgər yazını saytdan sildirməsən, uşağını bağçaya qəbul etməyəcəyəm.” Və bu hədəsini gerçəkləşdirərək valideyn və körpə uşağı gözüyaşlı şəkildə bağçadan uzaqlaşdırıb. Görünür, o, “Burda mən, Bağdadda kor xəlifə” deyimini özünə şüar seçərək dövlət müəssisəsini şəxsi təsərrüfatına çevirməyə çalışır.

Əziz izləyicilər, bizi izləməyə davam edin. Sumqayıt şəhərindəki 26 saylı uşaq bağçası ilə bağlı yeni və daha ciddi faktları tezliklə diqqətinizə çatdıracağıq.
Qarşı tərəfin də mövqeyini işıqlandırmağa hazırıq. Ümid edirik ki, dövlət təhsil müəssisəsində baş verən bu cür hallara müvafiq qurumlar tərəfindən hüquqi qiymət veriləcək və valideynlərin hüquqları müdafiə olunacaq.
Davamı var...