Mürkür kənd tam orta məktəbində Uşaq Birliyi Rəhbəri Nərmin Rüstəmovanın fəaliyyəti ilə bağlı dərc olunan yazılardan sonra məsələ daha da ciddiləşib. Sosial şəbəkələrdə, xüsusilə TikTok platformasında yayılan videolarda və şərhlərdə səslənən fikirlər iddiaların əsassız olmadığını göstərir.

Belə ki, faktları təsdiqləyən bəzi şagirdlərin sözlərinə görə, məktəbdə alış-verişə (məcburi və ya qeyri-rəsmi yığımlara) icazə verilmədiyi bildirilsə də, məsələ ictimailəşdirildikdən sonra tamam fərqli bir yanaşma ortaya çıxıb. İddialara əsasən, Nərmin Rüstəmova adı çəkilən yazıları “silmədikləri” təqdirdə şagirdləri polisə verməklə hədələyib.

Bu iddia artıq söhbəti təkcə etik davranışdan yox, psixoloji təzyiq və vəzifə səlahiyyətlərindən sui-istifadə müstəvisinə gətirir. Uşaq Birliyi Rəhbərinin əsas missiyası uşaqların hüquqlarını qorumaq, onların təhlükəsiz və sağlam mühitdə inkişafına dəstək olmaqdır. Şagirdləri qorxutmaq, susdurmağa çalışmaq isə bu missiyanın tam əksidir.

Əgər deyilənlər doğrudursa, bu artıq təkcə məktəb daxili problem deyil. Bu, təhsil mühitində uşaqlara qarşı təzyiq mexanizminin formalaşması deməkdir. Sosial şəbəkədə danışan uşaqların “yazıları silməsəniz, polisə veriləcəksiniz” kimi sözlərlə hədələnməsi hansı qanuna, hansı pedaqoji yanaşmaya sığır?

Məsələ ilə bağlı Xaçmaz Rayon Təhsil Sektoru, eləcə də aidiyyəti qurumlar susqun qalmamalıdır. İddialar araşdırılmalı, faktlar təsdiqini taparsa, hüquqi qiymət verilməlidir. Çünki bu gün susdurulan bir uşaq, sabah haqqını deməyə qorxan bir vətəndaşa çevrilir.

Bu suallar hələ açıq qalır:
– Şagirdlər hansı əsasla polisə verməklə hədələnir?
– Məktəbdə baş verənlər niyə uşaqların dili ilə TikTok-da danışılır?
– Rəsmi qurumlar bu iddialara niyə reaksiya vermir?

Mövzunu diqqətdə saxlayacağıq. Susmaq problemi həll etmir, sadəcə onu dərinləşdirir.

Qeyd edək ki, yazıda adı çəkilən Nərmin Rüstəmovanın və digər aidiyyəti şəxslərin mövqeyini dinləməyə və qarşı tərəfin açıqlamasını olduğu kimi dərc etməyə hazırıq. Məqsədimiz kimisə hədəf almaq deyil, məsələyə aydınlıq gətirilməsi və təhsil mühitində yaranan sualların cavablandırılmasıdır.