“Təhsil adı altında qurulan sistem: Sumqayıt 23 nömrəli məktəbdə baş verənlər” sərlövhəli yazımızdan sonra məsələ ilə bağlı yeni detallar üzə çıxmaqdadır. Məlumatlara əsasən, sözügedən yazıda yer alan iddialar cəmiyyətdə geniş rezonans doğurub və aidiyyəti qurumların diqqətini cəlb edib.

Etibarlı mənbədən BNTV.az-a bildirilir ki, Sumqayıt şəhər 23 saylı tam orta məktəbdə baş verdiyi iddia olunan qanun pozuntuları ilə bağlı Elm və Təhsil Nazirliyi tərəfindən operativ addım atılıb. Nazirliyin daxili nəzarət mexanizmləri çərçivəsində xüsusi yoxlama qrupunun məktəbə göndərildiyi və araşdırmalara başlanıldığı qeyd olunur. Bu addım, ictimaiyyət arasında yayılan korrupsiya, qeyri-rəsmi ödənişlər və təhsildə maliyyə yeyintiləri ilə bağlı iddiaların ciddi xarakter daşıdığını göstərir.

Mənbələr bildirir ki, məktəbdə müəyyən sistemli şəkildə qurulduğu iddia edilən qeyri-şəffaf maliyyə mexanizmləri, valideynlərdən müxtəlif adlar altında vəsaitlərin toplanması və bu vəsaitlərin təyinatı üzrə istifadə olunmaması kimi hallar araşdırma predmetinə çevrilib. Eyni zamanda, tədris prosesində də müəyyən nöqsanların olduğu barədə iddialar yoxlama çərçivəsində qiymətləndirilir.

Qeyd olunur ki, məhz bu iddiaların ciddiliyi səbəbindən Nazirlik tərəfindən dərhal yoxlama aparılması barədə göstəriş verilib. Hazırda aparılan araşdırmanın nəticələri həm valideynlər, həm də ictimaiyyət üçün böyük maraq doğurur.

Həmin başlıq altında gedən yazının mahiyyətini isə təqdim olunan linkdə yer alan məqalədən tam şəkildə anlamaq mümkündür. Orada qeyd olunan faktlar və iddialar mövcud vəziyyətin daha geniş mənzərəsini ortaya qoyur.

Məsələ ilə bağlı rəsmi açıqlamanın verilməsi və araşdırmanın nəticələrinin ictimaiyyətə təqdim olunması gözlənilir. Mövzu diqqətdə saxlanılır və yeni məlumatlar olduqca ictimaiyyətə çatdırılacaq.