Nazirlər regionlarda vətəndaş qəbulları keçirəndə həmin bölgədə yaşayan bütün rayonların sakinləri qəbul üçün müraciət edə bilirlər. Məsələn, Daxili İşlər Naziri cənab general Vilayət Eyvazov regionlarda qəbul keçirdiyi zaman təkcə həmin regionun deyil, hətta ölkənin digər şəhər və rayonlarında yaşayan vətəndaşları da dinləyir. Bu, dövlət idarəçiliyində bərabərlik prinsipinin ən klassik nümunəsidir.

Amma görünür, Elm və Təhsil Nazirliyində vəziyyət tamam fərqlidir.

Aprelin 17-də Qusar rayonunda keçiriləcək qəbul barədə məlumatda nazir cənab Emin Əmrullayev yalnız Quba, Qusar və Xaçmaz rayonlarının sakinlərini qəbul edəcəyini açıqlayıb. Halbuki Quba–Xaçmaz Regional Təhsil İdarəsinin tabeliyinə 5 rayon daxildir: Quba, Xaçmaz, Qusar, Şabran və Siyəzən.

Siyəzən və Şabran sakinlərinin qəbula yazıla bilməməsi isə haqlı olaraq narazılıq yaradıb.

Narazılıqları “aradan qaldırmaq” üçün bu dəfə də nazir müavini İdris İsayev 14 aprel tarixində Quba rayonunda növbədənkənar qəbul keçirəcəyini elan edib. Ancaq yenə eyni “formul”: yalnız Quba, Siyəzən və Şabran sakinləri. Yəni region yenidən “parçalanır”, vətəndaşlar yenə süni bölgülərə məruz qalır.

Edu.gov.az saytında nazir müavinlərinin qəbuluna istənilən vaxt yazıla bilməsi qeyd olunsa da, regiondakı qəbul zamanı yalnız 3 rayon sakinlərinin qəbul etməsi təhsil idarəçiliyində yeni suallar doğurur.

Tabeliyində 5 rayon olan bir idarədə qəbulların yalnız 3 rayon sakinlərinə şamil olunması, digər ikisinin isə kənarda saxlanılması idarəetmədə şəffaflığın olmadığını və qərarların subyektiv meyarlarla verildiyini açıq şəkildə göstərir.

Redaksiyamıza daxil olan məlumatlara əsasən regionda nazirin qəbuluna yazılan vətəndaşlara süni maneələr yaradılır. Səs yazılarından da görünür ki, bəzilərinə hədə-qorxu gəlir, bəzilərinə müəyyən vədlər verilir, bir qism vətəndaşa isə qohumları vasitəsilə “qəbula gəlmə” ismarıcı göndərilir. Həmçinin Bakıda nazirin qəbuluna yazılan insanların qəbul edilməməsinə dair videofaktlar da redaksiyamıza təqdim olunub.

Nazirin yalnız 3 rayondan olan sakinləri qəbul edib digər 2 rayonu kənarda saxlaması təhsil sahəsində idarəetmənin iflasını və qeyri-şəffaflığını bir daha ortaya qoyur.

Bütün bunlar cəmiyyətdə haqlı suallar yaradır:

Necə olur ki, Quba sakinləri həm nazirin, həm də müavinin qəbuluna düşə bilir, amma eyni regionun digər rayonlarının sakinləri bu hüquqdan məhrum edilir?
Bu ayrı-seçkilik hansı meyara əsaslanır?
Bu, vətəndaşların Konstitusiya ilə təsbit olunmuş bərabər hüquqlarının pozulması deyilmi?

Və ən acı sual:

Cənab Emin Əmrullayev və İdris İsayev özlərini ölkənin əsas güc strukturlarından olan Daxili İşlər Naziri general Vilayət Eyvazovdan da üstünmü hesab edirlər ki, regionlara “ayrı-seçkilik prinsipi” ilə səfər edirlər?

Sonda isə kiçik, amma vacib bir xatırlatma:

Cənab Emin Əmrullayev, ən azından cənab general Vilayət Eyvazovdan örnək götürməyi unutmamalı idi. Bir daha xatırladaq: mia.gov.az saytına daxil olub vətəndaş qəbullarının necə şəffaf, bərabər və ayrı-seçkilik olmadan təşkil olunduğunu görmək kifayətdir.

Ən azı bu nümunə Elm və Təhsil Nazirliyinə öz yaratdığı nöqsanları düzəltmək və illərlə şəffaf olmayan idarəçiliyin heç olmasa görüntüsünü formalaşdırmaq imkanı verə bilər.