Zərifə Əliyeva adına Xaçmaz şəhər 8 nömrəli lisey ilə bağlı redaksiyamıza daxil olan müraciətlərdə bir sıra ciddi iddialar səsləndirilib. BNTV.az-a müraciət edən müəllimlərin sözlərinə görə, liseydə son dövrlər açıq şəkildə pul yığımı aparıldığı iddia olunur.

Müraciətdə bildirilir ki, məktəbə yoxlama göndərildikdən sonra yeni təyin olunduğu deyilən direktor səlahiyyətlərini icra edən Nəzakət Mahmudova tərəfindən müəllimlərdən “yoxlamanı yola salmaq” adı ilə hər birindən 50 manat pul tələb edilib.

İddialara görə, əvvəlki direktor səlahiyyətlərini icra edən Sədaqət Cəmiyeva da müəllimlərlə söhbət zamanı bildirib ki, onun rəhbərlik etdiyi dövrdə müəllimlərdən pul tələb olunmayıb. Müraciət edənlərin sözlərinə əsasən, Nəzakət Mahmudova rəhbər səlahiyyətlərini icra etməyə başladıqdan sonra belə halların başlandığı iddia edilir.

Redaksiyaya danışan digər müəllim isə iddia edir ki, müəllimlərdən pul yığılarkən bildirilib ki, həmin vəsaiti götürmək üçün İnzibati sektorun müdiri olduğu deyilən Fikrət Heybətov gələcək. İddialara görə, əks halda yoxlama zamanı dərslərdə iştirak edən şəxslərin müəllimlər barədə mənfi rəy yazacağı qeyd olunub.

Müraciətdə liseydə təhsil prosesi ilə bağlı başqa narahatlıqlar da səsləndirilib. Müəllimlərdən biri iddia edir ki, yuxarı sinif şagirdlərinin əksəriyyəti məktəbdə görünmür və repetitor fəaliyyətinə maraq yaranması üçün müəyyən şərait formalaşdırıldığı bildirilir.

Başqa bir müəllim isə iddia edir ki, işə üzrlü səbəbdən gəlməmək üçün icazələrin verilməsi zamanı qeyri-rəsmi münasibətlər və “baxım-görüm” tələbləri ön plana çıxır.

Qeyd edək ki, səsləndirilən bütün bu fikirlər və iddialar müraciət edən şəxslərə aiddir və qarşı tərəfin mövqeyi hələlik məlum deyil.

Məsələ ilə bağlı adı çəkilən şəxslərin və aidiyyəti qurumların mövqeyini dərc etməyə hazırıq.