Etibarlı mənbələrdən redaksiyamıza daxil olan məlumatlara görə, Bakı Şəhər İcra Hakimiyyətinin başçısı Eldar Əzizov tərəfindən paytaxtın rayon icra hakimiyyətlərinə qanunsuz tikintilərin qarşısının qəti şəkildə alınması, belə hallara yol verilməməsi və nəzarətin gücləndirilməsi ilə bağlı göstəriş və tövsiyələr verildiyi bildirilir. Bu istiqamətdə əvvəlki illərdə də rayon rəhbərlərinə qanunsuz tikintilərə görə şəxsi məsuliyyət daşıdıqları barədə rəsmi xəbərdarlıqlar edilib.
Lakin Yasamal rayonu ərazisində müşahidə olunan vəziyyət bu göstərişlərin tam şəkildə icra olunmadığı barədə ciddi suallar yaradır.

İddialara görə, Yasamal Rayon İcra Hakimiyyətinin başçısı Elşad Həsənovun rəhbərlik etdiyi qurum, eləcə də şəhərsalma sahəsinə cavabdeh aidiyyəti strukturlar rayon ərazisində aparılan bəzi iri tikinti işlərinə lazımi nəzarəti həyata keçirmir və nəticədə qanun pozuntularına göz yumulduğu barədə iddialar səsləndirilir.

Redaksiyamızın Xıdır Mustafayev və Abbas Mirzəzadə Şərifzadə küçələrinin arasında apardığı müşahidələr zamanı tikinti meydançasında təhlükəsizlik qaydalarına əməl olunmaması, hündürmərtəbəli tikilinin ətraf obyektlərlə ara məsafəsinin mübahisə doğuracaq şəkildə yaxın olması, əmək münasibətlərinin qanunvericiliyə uyğun rəsmiləşdirilməməsi ehtimalı və digər məqamlar diqqəti cəlb edib.

Məsələ ilə bağlı redaksiyamız tərəfindən dəfələrlə Yasamal Rayon İcra Hakimiyyətinə və aidiyyəti şəhərsalma qurumlarına rəsmi sorğular göndərilməsinə baxmayaraq, ya ümumiyyətlə cavab verilməyib, ya da "araşdırılacaq" və ya "tikinti başa çatdıqdan sonra məlumat veriləcək" məzmunlu cavablarla kifayətlənilib. Halbuki, mümkün qanun pozuntularının tikinti başa çatdıqdan sonra deyil, tikinti prosesi zamanı araşdırılması daha məqsədəuyğun hesab olunur.

Yaranmış vəziyyət fonunda aşağıdakı suallar aktuallığını qoruyur:

* Əgər Bakı Şəhər İcra Hakimiyyəti tərəfindən qanunsuz tikintilərin qarşısının alınması barədə göstərişlər verilibsə, Yasamal rayonunda bu nəzarət niyə effektiv görünmür?
* Tikintinin bütün icazə və razılaşdırıcı sənədləri mövcuddurmu?
* Tikinti prosesinə cavabdeh dövlət qurumları ərazidə monitorinq aparıbmı və bunun nəticələri nə olub?

Qeyd edirik ki, yazıda yer alan bəzi məqamlar redaksiyaya daxil olmuş məlumatlar və müşahidələr əsasında irəli sürülən iddialardır. Redaksiya olaraq Yasamal Rayon İcra Hakimiyyətinin, aidiyyəti şəhərsalma qurumlarının və tikintini həyata keçirən tərəfin mövqeyini dərc etməyə hazırıq.

"Eldar Əzizov Bakıda qanunsuz tikililərlə bağlı icra ..."