Abşeron rayonunun Məhəmmədli qəsəbəsində qanunsuz tikinti halları ilə bağlı ortaya çıxan mənzərə getdikcə daha ciddi suallar doğurur. Ərazidə aparılan müşahidələr və yerli sakinlərin bildirdikləri onu göstərir ki, sənədsiz inşa olunan “makler evləri” artıq adi hala çevrilib.

Ən diqqətçəkən məqam isə tikinti sahiblərinin bu qanunsuzluğu gizlətmək əvəzinə, açıq şəkildə müəyyən şəxslərin adını çəkməsidir. Belə ki, jurnalistlərin apardığı araşdırmalar zamanı bir çox tikinti sahiblərinin eyni cavabı verdiyi bildirilir: “Bizim icazəmiz var, Memar Kənan müəllimlə danışın, sənədlər ondadır.”

Bu ifadə artıq tək-tək halların deyil, sistemli yanaşmanın göstəricisi kimi qiymətləndirilir. Bakunews.az xəbər verir ki, müxtəlif ünvanlarda eyni cavabın təkrarlanması, məsuliyyətin konkret bir şəxs üzərinə yönləndirilməsi təsadüfi görünmür.

Məsələ ilə bağlı adı hallanan şəxsin, Abşeron rayon İcra Hakimiyyətinin memarlıq sahəsinə cavabdeh olduğu bildirilən Kənan müəllimin fəaliyyəti ətrafında ciddi suallar yaranır. Əgər doğrudan da tikinti sahibləri onun adından istifadə edirsə, bu halda iki ehtimal ortaya çıxır: ya onun adından qanunsuz istifadə edilir, ya da bu proseslərə qeyri-rəsmi şəkildə göz yumulur.

Hər iki halda vəziyyət narahatedicidir.

Digər tərəfdən, Dövlət Şəhərsalma və Arxitektura Komitəsi məlumat bazasında həmin tikililərlə bağlı hər hansı qeydiyyatın olmaması, qanunsuz tikinti ehtimalını daha da gücləndirir. Bu isə sualı daha da kəskinləşdirir: rəsmi qeydiyyatı olmayan tikililər hansı əsasla inşa olunur və kim tərəfindən qorunur?

Mövcud vəziyyət onu göstərir ki, problem artıq təkcə qanunsuz tikinti məsələsi deyil. Bu, idarəetmə, nəzarət və məsuliyyət mexanizmlərinin ciddi şəkildə sınağa çəkildiyi bir sahəyə çevrilib.

Məsələ ilə bağlı adı çəkilən şəxslərin və aidiyyəti qurumların mövqeyini dərc etməyə hazırıq.