Quba-Xaçmaz Regional Təhsil İdarəsinin İnzibati-Təşkilat sektorunun müdiri Fikrət Heybətovla bağlı son vaxtlar ictimai maraq doğuran suallar yaranıb. Söhbət onun dövlət qulluğundan keçə bilməməsi və hazırda bu vəzifədə müqavilə əsasında çalışmasından gedir. Açıq mənbələrdə və sistem daxilində dolaşan məlumatlara görə, dövlət qulluğundan keçməyən bu statusda çalışan şəxsin aylıq əməkhaqqı 900 manat deyil, təxminən 450 manat civarındadır. Bu günə olan məvacibin bu cür olması ehtimal edilir.

İlk baxışdan hər şey “qanun çərçivəsində” görünə bilər. Lakin suallar məhz bundan sonra başlayır.

Məlumata görə, Fikrət Heybətov Mitsubishi Eclipse Cross markalı, bazar dəyəri təxminən 45–50 min manat olan avtomobildən istifadə edir. İndi isə ən sadə vətəndaş məntiqi ilə haqlı bir sual ortaya çıxır:
450 manat aylıq maaş alan bir məmur (və ya müqaviləli vəzifəli şəxs) bu səviyyədə avtomobili necə və hansı vəsait hesabına əldə edə bilər?

Hətta fərz edək ki, əməkhaqqı 900 manatdır. Bu məbləğlə belə, nəinki 50 min manatlıq avtomobil almaq, onu saxlamaq, sığortalamaq, yanacaq və servis xərclərini qarşılamaq real görünmür. Bəs 380 manatla bu “komfort” necə təmin olunur?

Burada söhbət kiminsə şəxsi mülkiyyətinə müdaxilə etməkdən getmir. Söhbət gəlirlə xərclər arasındakı uyğunsuzluqdan, yəni cəmiyyətin cavab gözlədiyi legitim suallardan gedir. Çünki təhsil sistemi onsuz da problemlər içində boğulduğu bir vaxtda, həmin sistemdə mühüm vəzifə tutan şəxslərin həyat tərzi ictimai maraq doğurmaya bilməz.

Əks halda suallar daha da artacaq. Çünki bu ölkədə müəllim 700 manat maaşla kreditə telefon alanda sorğu-sual olunur, amma 380 manat məvaciblə 50 min manat dəyərində avtomobil sürənlər nədənsə hesabat verməyə qarşı “toxunulmaz” olur.

Üstəlik nəzərə almaq lazımdır ki, sözügedən şəxsin hər gün Xaçmaz–Quba marşrutu üzrə gedib-gəlməsi, yol və gündəlik qidalanma xərcləri də əlavə yük yaradır. Qubada yaşayanlar yaxşı bilir ki, şəhərin məşhur Çinar (Naçnoy) restoranında nahar etmək ucuz başa gəlmir. Bütün bu xərclər 450 manatlıq maaş fonunda istər-istəməz şəffaflıqla bağlı suallar doğurur.

Top artıq aidiyyəti qurumlardadır.
Şəffaflıq varsa — cavab vermək çətin olmamalıdır.