Şabran, Bakunews.az – Şabran rayonunun Şah İsmayıl Xətai küçəsinin kəsişməsində yaşayan sakinlər uzun müddətdir yol problemi ilə üzləşirlər. Küçənin vəziyyəti kritik səviyyədədir və edilən müraciətlərə baxmayaraq hələ də həllini tapmayıb.

Sakinlərin sözlərinə görə, qış aylarında yağan yağış küçəni tamamilə palçığa qərq edir. Hərəkət etmək demək olar ki, mümkünsüz olur. Uşaqlar məktəbə gedərkən, yaşlı sakinlər isə evdən çıxmaqda ciddi çətinliklərlə üzləşirlər.

Yay aylarında isə vəziyyət fərqli deyil. Torpaq yol qalın toz qatına çevrilir, hər avtomobil hərəkəti ətrafı toz-dumana bürüyür. Evlərin pəncərələrini açmaq mümkün olmur, həyətlər və evlərin içi tozla dolur ki, bu da xüsusilə azyaşlı uşaqlar və yaşlı sakinlər üçün sağlamlıq baxımından təhlükəlidir.

İkinci Qarabağ müharibəsi iştirakçısı və Vətən müharibəsi veteranı olan sakin bildirib:
“Biz bu torpaq uğrunda döyüşmüşük. Amma bu gün öz yaşadığımız küçədə normal şəraitimiz yoxdur. Qışda palçıqdan, yayda tozdan əziyyət çəkirik. Dəfələrlə icra nümayəndəliyinə müraciət etmişik, lakin heç bir nəticə yoxdur.”

Sakinlər aidiyyəti qurumlardan küçənin asfaltlanmasını və ya əsaslı şəkildə təmir olunmasını xahiş edirlər. Onlar bildirirlər ki, mövcud vəziyyət həm sosial, həm də sanitar baxımdan ciddi problemlər yaradır.

Sakinlər ümid edirlər ki, məsələ ictimailəşdirildikdən sonra problemə diqqət yetiriləcək və Şah İsmayıl Xətai küçəsinin kəsişməsində yaşayan insanlar normal yol şəraiti ilə təmin olunacaqlar.