“Xural” qəzetinin baş redaktoru Əvəz Zeynallı RATİ-nin əməkdaşı ilə söhbətində rəhbərlik etdiyi qəzetin millət vəkili Aynur Camalqızının həyat yoldaşı tərəfindən hədələndiyini bildirib.

“Biz bir müddət əvvəl “Onda eləydi, indi belə” rubrikası çərçivəsində millət vəkili Aynur Camalqızının 2003-ci il Prezident seçkiləri ərəfəsində “Yeni Müsavat” qəzetində Heydər Əliyev və İlham Əliyev barədə yazdığı köşə yazılarını olduğu kimi, heç bir əlavə və dəyişikliklər etmədən dərc etməyə başladıq. Buna görə indi bizə zəng vurub bizi cəzalandıracaqları ilə, öldürəcəkləri ilə hədələyirlər və deyirlər ki, bu yazıları çap etməyək”, – deyə vurğulayan Zeynallı yazıları dayandırmaq fikrində olmadıqlarını qeyd etdi.
Baş redaktorun sözlərinə görə, o artıq Milli Təhlükəsizlik və Daxili İşlər Nazirliyinə müraciət edib. Zeynallı bu məsələ ilə əlaqədar iyulun 30-da RATİ-nin mətbuat mərkəzində mətbuat konfransı keçirməyi də planlaşdırır.
Qeyd edək ki, 2003-cü ildə yazdığı köşə yazılarında Camalqızı Əliyevləri kəskin surətdə tənqid edirdi.