Gənc yazar Aynur İsmayılın kitabının təqdimatı və imza günü keçirilib
Azərbaycan Yazıçılar Birliyinin Lənkəran Bölməsinin təşkilatçılığı ilə Lənkəran Şəhər Mədəniyyət Mərkəzində gənc yazar Aynur İsmayılın yeni nəşr olunmuş “Təsadüfmü, zərurətmi?” adlı kitabının təqdimatı və imza günü keçirilib.

Tədbirdə bölgə yazarları, mədəniyyət işçiləri, Lənkəran Dövlət Universitetinin (LDU) müəllim və tələbələri, eləcə də müəllifin ailə üzvləri və yaxınları iştirak ediblər.

Tədbiri giriş sözü ilə açan AYB Lənkəran Bölməsinin sədri, yazıçı-dramaturq Qafar Cəfərli bildirib ki, bölmənin fəaliyyətində əsas istiqamətlərdən biri gənc yazıçı və şairlərə xüsusi diqqət və qayğı göstərmək, onların ədəbi mühitə inteqrasiyasına dəstək olmaqdır. O, gənc və istedadlı nasir Aynur İsmayılla keçirilən görüşün də bu məqsədə xidmət etdiyini və xüsusi əhəmiyyət daşıdığını vurğulayıb.

Tədbir çərçivəsində Aynur İsmayılın son bir il ərzində Lənkəran Şəhər Mədəniyyət Mərkəzində, Lənkəran Mərkəzi Kitabxanasında və Sumqayıt Dövlət Universitetində keçirilmiş görüşlərini əks etdirən videoçarx nümayiş olunub.

Daha sonra LDU-nun tələbəsi Davud Əbulfəzov müəllifin indiyədək nəşr edilmiş “Generalın qızı” və “Təsadüfmü, zərurətmi?” adlı kitabları haqqında məruzə ilə çıxış edib.

Tədbirdə şairlər Ağamir Cavad, Xanlar Həmid, Gülarə Fazilqızı və Hacı Qərib Nəzərov, LDU-nun müəllimi Sahil Cəfərov, GİKM-in Lənkəran-Astara regional nümayəndəliyinin rəhbəri Famil Məmmədov, Lənkəran Şəhər Mədəniyyət Mərkəzinin bədii rəhbəri Habil Əliyev, eləcə də müəllifin tələbə yoldaşları Yusif Muradov və Valeh Zeynallı çıxış edərək gənc yazarın yaradıcılığı barədə fikir və düşüncələrini bölüşüblər.

LDU-nun tələbəsi Rüqəyya Qasımovanın ifasında Aynur İsmayılın müəllifi olduğu şeirin səsləndirilməsi tədbir iştirakçıları tərəfindən maraqla qarşılanıb.

Sonda gənc yazar Aynur İsmayıl və onun atası, ehtiyatda olan hərbçi Nurəli İsmayılov tədbirin təşkilatçılarına və iştirakçılarına minnətdarlıqlarını bildiriblər.

Tədbir AYB Lənkəran Bölməsinin sədri, yazıçı-dramaturq Qafar Cəfərlinin yekun çıxışı ilə başa çatıb. Sonda xatirə şəkilləri çəkdirilib.