Dövlət idarəçiliyində şəffaflıq və qanunun aliliyi əsas prinsip kimi qəbul edilsə də, bəzi hallarda bu prinsiplərin pozulduğu müşahidə olunur. Bu cür halların biri də Sabunçu rayonu üzrə Texniki İstismar Xidmətinin keçmiş rəisi Natiq Mustafayevin işdən çıxarılması və daha sonra yenidən yüksək vəzifəyə gətirilməsi məsələsində özünü göstərir.

Vətəndaş Səfaət Məmməd qızı Babayeva tərəfindən edilən şikayət və aparılan araşdırmalar nəticəsində Natiq Mustafayevin qanunsuz hərəkətlərə yol verdiyi sübut olunmuşdu. 2018-ci ildə "Azəriqaz" İstehsalat Birliyi və SOCAR tərəfindən verilən cavablarda göstərilmişdi ki, Azərbaycan Respublikası Prezident Administrasiyasının və aidiyyəti qurumların apardığı yoxlamalar nəticəsində Mustafayevin ciddi nöqsanlara yol verdiyi aşkar edilib. Bu səbəbdən, 21 fevral 2019-cu il tarixində SOCAR-ın rəsmi əmri ilə o, tutduğu vəzifədən azad olunmuşdu.

Lakin qəribə məqam ondan ibarətdir ki, şiddətli töhmət alaraq işdən azad edilən Natiq Mustafayev sonradan üç rayon üzrə rəis vəzifəsinə təyin olunub. Bu təyinat hansı qanuna əsaslanır? Prezident Administrasiyasının və dövlət auditinin verdiyi rəy necə heçə sayılıb?

Burada əsas sual ortaya çıxır: Natiq Mustafayev hansı qüvvələrin dəstəyi ilə yenidən rəhbər vəzifəyə gətirilib? Məlumatlara görə, onun bu mövqeyə qaytarılmasının arxasında Zamin Mehrəliyev dayanır. Əgər bir dövlət qurumu vəzifəli şəxsin qanunsuzluq etdiyini təsdiqləyərək onu işdən azad edirsə, necə ola bilər ki, başqa bir şəxs həmin qərarı heçə sayaraq onu daha məsuliyyətli bir vəzifəyə təyin edir?

Həmçinin qeyd edilməlidir ki, mediada yayılan məlumatlara əsasən Natiq Mustafayev Zamin Mehrəliyevin dayısı oğlu olduğu deyilir. Lakin etibarlı mənbələr bu şəxslərin münasibətinin qohumluq deyil normal cəmiyyətin qəbul edə bilməyəcəyi münasibətə söykəndiyini iddia edən məbə sırada bu cür neçə neçə şəxslərin adını çəkə biləcəyinidə vurğulayıb. Bəzi qohum bağlarını gizli saxlanılması qanuna zidd əməllərin ört-bastır edilməsinə rahat şərait yaradıldığıda iddia edilir.

Bu cür hallar dövlət orqanlarının qərarlarının nüfuzdan salınmasına, hüquqi sistemin zəiflədilməsinə və korrupsiyanın daha da dərinləşməsinə səbəb olur. Əgər bir vəzifəli şəxs işində yol verdiyi ciddi qanun pozuntularına görə cəzalandırılıbsa, onun yenidən eyni və ya daha yüksək vəzifəyə gətirilməsi qanunun aliliyinə açıq şəkildə hörmətsizlikdir.

Məsələ ilə bağlı müvafiq dövlət qurumlarının açıqlama verməsi və belə halların qarşısının alınması üçün ciddi tədbirlərin görülməsi vacib hesab edilir. Əks halda, bu kimi hadisələr vətəndaşların dövlətə və onun idarəçilik sisteminə olan inamını daha da sarsıda bilər.

Məsələ ilə bağlı tərəflərin mövqeyini dinləməyə hazırıq.