Xaçmazda fiziki qüsurlu qardaşın pensiyası əlindən alındı, istismar və işgəncə iddiaları — DİN-dən AÇIQLAMA
Xaçmaz rayonunun Yergüc kəndində baş verən ailədaxili zorakılıq və istismar faktı ictimaiyyətdə ciddi narahatlıq doğurub. Bakunews.az-a daxil olan məlumata əsasən, 1998-ci il təvəllüdlü Əspəndiyev Əmraslan Müslüm oğlu və 1992-ci il təvəllüdlü qardaşı Əspəndiyev Ələsgər Müslüm oğlu ögey ailə üzvləri tərəfindən vəhşicəsinə döyülüb.
Zərərçəkmişlər bildirirlər ki, onları ögey qardaşı Əspəndiyev İlyas Müslüm oğlu, onun həyat yoldaşı Əspəndiyev Yeganə Məhəmməd qızı və oğlu Əspəndiyev Elşən İlyas oğlu tərəfindən dəfələrlə fiziki təzyiqlərə məruz qalıblar.
Əldə olunan məlumatlarda o da qeyd olunur ki, qardaşlardan biri fiziki qüsurludur və ona təyin olunan pensiya kartı da ögey ailə üzvləri tərəfindən mənimsənilib. Bununla kifayətlənməyən ögey qardaş İlyas Əspəndiyevin, evinin həyətində qurduğu fermada qardaşlarını məcburi əməyə cəlb etdiyi, iş görmək istəmədikdə isə müxtəlif fiziki və psixoloji işgəncələr tətbiq etdiyi iddia olunur.
Məsələ ilə bağlı Bakunews.az tərəfindən Daxili İşlər Nazirliyinin Mətbuat Xidmətinin Quba regional qrupunun baş inspektoru, polis baş leytenantı Xəyal Talıbova məlumat verilib. Açıqlamada qeyd olunur:
"Məsələ Xaçmaz Rayon Polis Şöbəsi tərəfindən nəzarətə götürülüb. Daxil olan məlumat üzrə araşdırma aparılır. Müvafiq ekspertiza təyin edilib. Ekspertiza rəyindən asılı olaraq xəsarətin dərəcəsi müəyyən olunmaqla əmələ hüquqi qiymət veriləcəkdir."
Hadisənin dəqiq hüquqi qiymətləndirilməsi və təqsirli şəxslərə qarşı tədbirlərin görülməsi üçün ictimaiyyət və media qurumları prosesi diqqətlə izləyir. Bakunews.az bu məsələni nəzarətdə saxlayır və araşdırmanın nəticələrini ictimaiyyətə çatdıracaq.
Şikayət və təkliflər üçün qaynar xətt:
Əlaqə whatsapp:+994 70 402 02 85
BakuNews.az
Əlaqə whatsapp:+994 70 402 02 85
BakuNews.az
