16 yaşlı qızı qaçıran Abşeron rayonunun Aşağı Güzdək qəsəbəsində yerləşən məscidin imam müavini Turab Tahirov işdən çıxarılıb.

Müvafiq əmr Dini Qurumlarla İş üzrə Dövlət Komitəsinin sədri Ramin Məmmədov tərəfindən imzalanıb.

Məlumatı Komitənin mətbuat xidməti də təsdiqləyib.

Qurumdan verilən açıqlamada bildirilir ki, Turab Tahirovun vəzifədən azad olunması barədə əmr "İslam dininə aid ibadət yerlərinə və ziyarətgahlara din xadiminin təyin olunması, attestasiyası və tutduğu vəzifədən azad edilməsi Qaydası”nın 8.1.9-cu bəndinə uyğun olaraq imzalanıb.

"Dini Qurumlarla İş üzrə Dövlət Komitəsi Kollegiyasının 2022-ci il 22 aprel tarixli 02 nömrəli qərarı ilə təsdiq edilmiş “İslam dininə aid ibadət yerlərinə və ziyarətgahlara din xadiminin təyin olunması, attestasiyası və tutduğu vəzifədən azad edilməsi Qaydası”nın 8.1.9-cu bəndində göstərilir ki, din xadimi mənəvi dəyərlərə, etik-əxlaqi prinsiplərə, din xadiminin fəaliyyətinə zidd hərəkətlərə yol verdiyi halda tutduğu vəzifədən uzaqlaşdırıla bilər", - açıqlamada deyilir

Qeyd edək ki, Abşeron rayonu, Aşağı Güzdək qəsəbə məscidinin axundu Turab Əliqan oğlu Tahirov məsciddə Quran kurslarında iştirak edən 16 yaşlı qız qaçırıb.