İçkili halda “TikTok”da canlı yayım açaraq dini, namazı lağlağıya qoyan Füzuli Rayon İcra Hakimiyyəti başçısının müavini Gülbahar Eyvazovanın həyat yoldaşı Habil Eyvazov üzr istəyib.

Bakunews.az xəbər verir ki, o bu barədə açıqlama yayıb.

“Hər kəsdən üzr istəyirəm. Namaz qılıb oruc tutmasam da, həmişə Allaha inanmışam. Mənəvi dəyərlərə hörmət edirəm. İşlətdiyim ifadələr spirtli içkinin təsiri altında olub. Din əhlindən üzr istəyirəm”, - deyə o söyləyib.

H.Eyvazovun eyni zamanda Füzuli RİH-də sürücü işlədiyi deyilsə də, qurumdan onun uzun müddətdir RİH-də çalışmadığı bildirilib. İcra başçısının ictimai-siyasi, humanitar sahə üzrə müavini Gülbahar Eyvazova isə həyat yoldaşının gündəm olan videosundan sonra işdən ayrılmaq üçün ərizə yazıb.

Habil və Gülbahar Eyvazovlar ailəsinin vəzifəsindən azad edilən qızı Jalə Eyvazova kimdir?

Jalə Eyvazova 2003-cü ilin sentyabr ayında anadan olmuşdur. Füzuli rayon 59 nömrəli tam orta məktəbi bitirib. 2020-ci ildə Azərbaycan Dillər Universitetinin Xarici dil müəllimliyi (İngilis dili üzrə) ixtisasına qəbul olunub. Habil və Gülbahar Eyvazovlar ailəsinin 2003 təvəllüdlü qızı Jalə Eyvazova 2023-cü ildə Azərbaycan Dillər Universitetinin rektoru Kamal Abdullanın müvafiq əmri ilə oxuduğu fakültədə ictimai əsaslarla dekan müavini təyin olunmuşdu. Jalə Eyvazova həmin dövrdə Təhsil fakültəsinin üçüncü kurs tələbəsi olub. Tələbənin dekan müavini təyin olunması ictimaiyyətdə böyük narazılığla qarşılanmışdır. Hazırda Jalə Eyvazova dekan müavini vəzifəsindən azad edilib.