Kapital Bank ətrafında son günlər formalaşan narazılıqlar artıq tək-tək texniki problem kimi deyil, ictimai etimad və sosial ədalət məsələsi kimi qiymətləndirilməlidir. Məsələ ondan ibarətdir ki, bankın kart hesablarından xəbərdarlıq edilmədən və hüquqi əsaslar ictimaiyyətə açıqlanmadan vəsaitlərin tutulması ilə bağlı faktlar sistemli xarakter almağa başlayıb.

Bir neçə gün öncə "DogruXeber.tv" informasiya portalının rəhbəri Kamal Əsgərovun kart hesabından 3 manat məbləğində vəsaitin bank tərəfindən xəbərsiz şəkildə çıxarılması barədə məlumat yayılmışdı. Hadisə ilə bağlı edilən şikayətdən sonra Kapital Bank həmin məbləği geri qaytarsa da, bu addım problemin mahiyyətini aradan qaldırmadı. Əksinə, sonradan əldə olunan məlumatlar göstərir ki, söhbət tək bir müştəridən yox, geniş bir sosial təbəqədən – keçmiş məcburi köçkünlərdən gedir.

İddialara görə, eyni məbləğdə vəsait bir çox məcburi köçkünün kart hesabından çıxarılıb. Daha narahatedici məqam isə odur ki, vətəndaşların əksəriyyəti bu faktın fərqində olsa da, hüquqlarını bilmədikləri üçün etiraz etməkdən çəkiniblər. Bəziləri bu cür hallarla mütəmadi qarşılaşdıqlarını desə də, hansı instansiyaya müraciət edəcəkləri barədə məlumatsız olduqlarını bildiriblər.

Burada artıq məsələ bank-müştəri münasibətləri çərçivəsindən çıxır və dövlət-vətəndaş etimadı müstəvisinə keçir. Xüsusilə sosial baxımdan həssas qrup hesab olunan məcburi köçkünlərin bank əməliyyatları üzərindən bu cür qeyri-şəffaf müdaxilələrə məruz qalması, cəmiyyətdə haqlı suallar doğurur. Kapital Bank kimi iri və dövlətlə sıx əlaqəli maliyyə qurumunun bu davranışı, istər-istəməz, narazılığın bankdan kənara çıxaraq daha geniş institusional etimadsızlığa çevrilməsinə zəmin yaradır.

Son aylarda bank sektorunda artan şikayətlər, dələduzluq hallarının çoxalması və vətəndaşların maddi itkilərlə üzləşməsi fonunda bu cür addımlar sosial gərginliyi dərinləşdirən amil kimi çıxış edir. Xüsusilə aztəminatlı və hüquqi müdafiə imkanları zəif olan qrupların hədəfə çevrilməsi, ictimai rəyə mənfi təsir göstərməklə yanaşı, dövlətin sosial siyasətinə kölgə salır.

Sual yaranır: Kapital Bank müştərilərinə qarşı bu cür münasibəti hansı motivlərlə sərgiləyir və bu prosesə niyə vaxtında ictimai izahat verilmir? Əgər məsələ texniki xarakterlidirsə, niyə kütləvi xarakter alıb?
Yox, əgər sistemli yanaşma varsa, bu artıq təkcə bankın deyil, nəzarət mexanizmlərinin də məsuliyyətini gündəmə gətirir.

Belə vəziyyətdə aidiyyəti qurumların susqunluğu yox, aydın mövqe ortaya qoyması, bankların isə şəffaflıq və hesabatlılıq prinsiplərinə əməl etməsi cəmiyyət üçün həyati əhəmiyyət daşıyır. Əks halda, kiçik məbləğlərlə başlayan bu cür hallar, böyük etimad itkilərinə yol aça bilər.(DogruXeber.tv)