Son günlər paytaxt ərazisində müşahidə olunan normadan artıq və aramsız yağıntılar bir sıra ərazilərdə, xüsusilə də Xəzər rayonunun qəsəbələrində kommunal infrastruktur üçün ciddi sınaqlar yaradıb. Mövcud vəziyyətlə əlaqədar olaraq Xəzər rayon Mənzil-Kommunal Təsərrüfatı Birliyi tərəfindən operativ tədbirlər planı hazırlanaraq dərhal icraya yönəldilib.

Birliyin əməkdaşları gücləndirilmiş iş rejimində fəaliyyət göstərərək rayonun müxtəlif qəsəbələrində yaranmış problemlərin aradan qaldırılması istiqamətində fasiləsiz iş aparırlar. Əsas diqqət yağış sularının yollarda və yaşayış məntəqələrində yığılmasının qarşısının alınmasına, suötürücü xətlərin və kanalizasiya sistemlərinin təmizlənməsinə yönəldilib.

Xüsusilə Buzovna, Zaqulba və Aeroport yolu istiqamətində yerləşən ərazilərdə vəziyyət nəzarətə götürülüb. Həmin ərazilərdə yağış sularının axınının təmin olunması, yol infrastrukturunun təhlükəsizliyinin qorunması və nəqliyyatın fasiləsiz hərəkətinin bərpası üçün xüsusi texnika və işçi qüvvəsi cəlb olunub.

Aparılan operativ tədbirlər nəticəsində artıq bir çox ərazilərdə su yığıntıları aradan qaldırılıb. Bununla yanaşı, daha problemli sahələrdə işlər mərhələli şəkildə davam etdirilir. Aidiyyəti qurum tərəfindən vəziyyət daim monitorinq olunur və yaranan hər bir çətinliyə çevik reaksiya verilir.

Sakinlərin təhlükəsizliyinin təmin olunması və gündəlik həyatın normal axarına qayıtması məqsədilə həyata keçirilən bu tədbirlər bir daha göstərir ki, kommunal xidmətlər fövqəladə hallara hazır vəziyyətdədir və istənilən çətinliyə qarşı operativ müdaxilə imkanına malikdir.

Hazırda da Xəzər rayonunun qəsəbələrində işlər fasiləsiz davam etdirilir və yaxın zamanda bütün ərazilərdə vəziyyətin tam sabitləşəcəyi gözlənilir.