Müasir həyatın ayrılmaz hissəsinə çevrilən stress insan orqanizminə həm fiziki, həm də psixoloji təsir göstərir.

Mütəxəssislərin sözlərinə görə, qısa müddətli stress bəzən faydalı olsa da, uzun müddətli gərginlik sağlamlıq üçün ciddi risklər yaradır.

Stress zamanı bədəndə bir sıra dəyişikliklər baş verir. Ən başlıcası, "döyüş və ya qaç" reaksiyası aktivləşir. Bu zaman ürək döyüntüsü sürətlənir, qan təzyiqi yüksəlir, nəfəsalma tezləşir. Orqanizm adrenalin və kortizol hormonlarını daha çox ifraz edir. Bu isə qısa müddətdə diqqəti artırsa da, uzun müddətdə yorğunluq, yuxu pozğunluğu və hətta immun sisteminin zəifləməsinə səbəb ola bilər.

Həkimlər qeyd edib ki, xroniki stres ürək-damar problemləri, həzm pozuntuları və depressiya riskini artırır. Buna görə də vaxtında tədbir görmək vacibdir.

Stresslə mübarizə aparmaq üçün bir neçə sadə üsul tövsiyə olunur. İlk növbədə, düzgün nəfəs alma texnikaları sinir sistemini sakitləşdirir. Açıq havada gəzinti, fiziki aktivlik və xüsusilə yoga kimi məşqlər stress səviyyəsini azaltmağa kömək edir. Bundan əlavə, kifayət qədər yuxu, balanslı qidalanma və gündəlik rejimin qorunması da vacib amillər sırasındadır.

Psixoloqlar vurğulayır ki, stressli hallarda yaxınlarla ünsiyyət qurmaq, hobbilərə vaxt ayırmaq və lazım gəldikdə mütəxəssis dəstəyi almaq insanın psixoloji vəziyyətini xeyli yaxşılaşdıra bilər.

Qeyd olunur ki, stress tamamilə qaçılmaz olsa da, onu düzgün idarə etmək sağlam həyatın əsas şərtlərindən biridir.