Avropa İttifaqı rusiyalılara sadələşdirilmiş vizaların verilməsindən tam imtinanı müzakirə edəcək. Bu tədbir sənədlərin yığılmasını çətinləşdirəcək və konsulluq rüsumunu artıracaq.

Çexiya Avropa İttifaqı ölkələrinə Rusiya Federasiyası və Belarus vətəndaşlarına Şengen vizalarının verilməsinin sadələşdirilmiş prosedurunu tamamilə ləğv etməyi təklif edəcək.

bakunews.az qaynarinfo-ya istinadən xəbər verir ki, bu barədə Bloomberg Çexiyanın xarici işlər naziri Yan Lipavskiyə istinadən məlumat yayıb.

Təklif Aİ xarici işlər nazirlərinin gələn həftə Praqada keçiriləcək qeyri-rəsmi görüşündə nəzərdən keçiriləcək.

Bu tədbir qəbul olunarsa, turist vizası üçün tələb olunan sənədlərin sayı artacaq, konsulluq rüsumu 35 avrodan 80 avroya yüksələcək və müraciətlərə daha uzun müddət baxılacaq.

"Bloomberg” bu təklifi "kompromis həlli” adlandırır. Rusiya ilə həmsərhəd olan bir sıra Aİ ölkələri, o cümlədən Estoniya və Finlandiya rusiyalılara viza verilməsini dayandırmağı təklif edir. Digər ölkələr, o cümlədən Almaniya bu cür məhdudiyyətlərə qarşı çıxır.

Xatırladaq ki, Rusiyanın Ukraynaya təcavüzündən sonra bir çox Aİ ölkələri rusiyalılara viza verilməsini dayandırıb və ya məhdudlaşdırıb. Avropa İttifaqı Rusiya diplomatları və iş adamları üçün sadələşdirilmiş vizaların verilməsi prosedurunu da ləğv edib.

Yayda Avropa İttifaqının Rusiya ilə həmsərhəd ölkələri rusiyalılara turist vizalarının verilməsini məhdudlaşdırmaq və ya tamamilə dayandırmaq zərurətindən danışmağa başlayıblar. Xüsusilə Estoniya rusiyalıların Estoniyanın verdiyi Şengen vizası ilə ölkəyə girişini məhdudlaşdırıb.

bakunews.az