Pakistan hökumətinin məlumatına görə, ölkədə şiddətli yağışlar və daşqınlar səbəbindən ölənlərin sayı mindən çox olub.

bakunews.az bu barədə "France 24"ə istinadən xəbər verir.

Pakistanın Milli Fəlakətlərin İdarə Edilməsi Təşkilatı (NDMA) bazar günü ölkədə iyul ayında başlayan musson yağışlarının səbəb olduğu daşqınların nəticəsində 1033 nəfərin həlak olduğunu açıqlayıb.

Qurumun məlumatına görə, təkcə son 24 saat ərzində ölkənin bəzi bölgələrində yağan güclü yağış nəticəsində 119 nəfər həyatını itirib.

Hökumətin məlumatında bildirilib ki, 33 milyondan çox insan təbii fəlakətdən zərər çəkib, bir milyona yaxın ev dağılıb və ya ciddi ziyan dəyib.

Milli Fəlakətlərin İdarə Edilməsi Təşkilatı həmçinin qeyd edib ki, 80 min hektardan çox kənd təsərrüfatı sahəsi məhv olub, 3400 kilometrdən çox yol və 149 körpü dağılıb.

Qeyd edək ki, adətən iyuldan sentyabr ayına qədər davam edən musson yağışları Hindistan yarımadasında tarlaları suvarmaq və su ehtiyatlarını yeniləmək üçün vacibdir. Lakin bu güclü yağışlar hər il çoxlu qurbanların verilməsinə və dağıntılara səbəb olur.\\qaynarinfo\

bakunews.az