Gürcüstanın “Sakartvelos Respublika” qəzetində müasir Azərbaycan dövlətinin qurucusu, görkəmli siyasi və dövlət xadimi Heydər Əliyevə həsr olunmuş “Silinməz izlər – Qafqaz xalqlarının taleyi və xatirələrində” sərlövhəli məqalə dərc olunub.
Məqalədə Gürcüstan Milli Elmlər Akademiyasının (GMEA) vitse-prezidenti, akademik Roin Metrevelinin dahi şəxsiyyət Heydər Əliyevlə bağlı fikirlərinə yer verilib.
Akademik bildirib ki, gürcü xalqının unudulmaz dostu Heydər Əliyevin anadan olmasının 100 illiyi münasibətilə ölkəmizdə “Heydər Əliyev İli” elan olunması xəbəri Gürcüstanda da xoş duyğularla qarşılanıb. Hələ sovet dövründə Heydər Əliyevin Azərbaycan rəhbərliyinə gəlməsi ilə öz ölkəsinin bütün sahələr üzrə inkişafında mühüm rol oynadığını yada salan Roin Metreveli bildirib ki, möhtəşəm şəxsiyyətlə ilk görüşü 1996-cı ildə İvane Cavaxişvili adına Tbilisi Dövlət Universitetinin rektoru kimi ona ali məktəbin fəxri doktoru diplomunu təqdim edərkən baş verib: “Səfər çərçivəsində ali qonaq Gürcüstan Prezidenti Eduard Şevardnadze ilə birlikdə universitetə gəldi. Azərbaycan rəhbəri çox təsirli və yadda qalan çıxışında ən səmimi duyğularını ifadə etdi, gürcü xalqına böyük sevgisindən danışdı, universitet və tələbələrə xoş sözlər ünvanladı, kollektivimizə uğurlar arzuladı. Tbilisi Dövlət Universiteti ilə Bakı Dövlət Universitetinin əməkdaşlığının daha da genişləndirilməsinin vacibliyini də vurğuladı”.
Akademik xatırladıb ki, görüşdən sonra Heydər Əliyev və Eduard Şevardnadze ilə birlikdə iki ölkə arasında elm, təhsil əlaqələrinin və mədəni əməkdaşlığın inkişaf etdirilməsi ilə bağlı ətraflı söhbət ediblər: “Biz bütövlükdə Qafqazın inkişaf perspektivləri barədə fikir mübadiləsi apardıq. Bu ilk görüş xatirimdə böyük iz buraxdı”.
O, qeyd edib ki, Heydər Əliyevlə ikinci görüşü 1999-cu ildə – Bakı Dövlət Universitetinin 80 illik yubileyində baş tutub: “Prezident Heydər Əliyev təntənəli toplantıdan sonra rektorlarla ayrıca görüş keçirdi. Bizi salamlayandan, görüşün önəmindən danışandan sonra sözü rektorlara verdi. Mən axıra qaldığımdan fikirləşdim ki, iki saat çəkən görüşdən sonra Heydər Əliyev yorğun ola bilər. Azərbaycan rəhbəri mənim də söz deməyimi istədi. Mən bu böyük insana onun TDU-nun fəxri doktoru olduğunu xatırladanda o, bundan məmnunluğunu söylədi və mənə xitabən düz 40 dəqiqə Gürcüstana olan sevgisindən və dostluğumuzdan danışdı”.
Roin Metreveli bildirib ki, titanik fəaliyyəti ilə öz xalqına sonadək fədakarlıqla və ləyaqətlə xidmət edən Heydər Əliyev böyük mənəvi zənginlik saçan nadir şəxsiyyətlərdən biri olub: “Qafqaz regionun da lideri sayılan Heydər Əliyev dünya miqyasında ən nüfuzlu siyasətçilərdən və dövlət başçılarından idi. O, bütün dünya üçün tarixi şəxsiyyət, unudulmaz siyasət nəhəngidir. Müstəqil Azərbaycan dövlətinin memarı və qurucusu Heydər Əliyevin layiqli davamçısı olan Prezident İlham Əliyevin rəhbərliyi altında ölkənizin yüksək və hərtərəfli inkişafı uğurla davam edir. İlham Heydər oğlu dərin zəkalı şəxsiyyət, ölkəsini irəli aparan, mənfi təsirlərdən qoruyan güclü dövlət başçısıdır”.
Şikayət və təkliflər üçün qaynar xətt:
Əlaqə whatsapp:+994 70 402 02 85
BakuNews.az