"Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin Bakı şəhər idarəsinin müdiri 50-dən çox ailəni evsiz qoyub. Bir neçə il bundan öncə vətəndaşlardan pul alaraq onların həyətyanı ərazilərdə fərdi yaşayış evləri tikməsinə şərait yaradan Samir adlı FHN məmuru, bu “yaxşılığı” ilə onlarla ailəni evsiz qoyub. Belə ki, bugünlərdə yetkili qurumlar tərəfindən aparılan araşdırma nəticəsində Sabunçuda FHN yetkilisinin icazəsi ilə tikilən evlərin qanunsuz olduğu üzə çıxıb. Bunun ardınca 50-dən çox ev aidiyyati qurum tərəfindən sökülərək yerlə bir edilib". Bu barədə "Bakunews.az"a göndərilən məqalədə deyilir.
Məqalədə daha sonra bildirilir: "Vətəndaşların iddiasına görə, onlar ev tikintisi üçün şifahi icazəni həm də Əmlak Məsələləri Dövlət Xidmətinin Bakı şəhəri üzrə yetkilisi, sabiq MTN əməkdaşı Ruslan Əliyevə verib. Təbii, bu icazə də müftə olmayıb və vətəndaşlar tikəcəkləri evlərin mərtəbə və sahəsinə görə Ruslan Əliyevə müxtəlif məbləğlərdə pul ödəyiblər. Lakin evlərin söküntüsü zamanı məlum olub ki, Samir adlı FHN məmuru kimi Ruslan Əliyevin də pul qarşılığında verdiyi icazələr əsassız imiş. Maraqlı məqmalardan biri də ondan ibarətdir ki, vətəndaşlar vaxtilə “hörmət” qarşılığında bu tikintiyə şərait yaradan şəxsləri - Samir və Ruslan Əliyevi tapıb pullarını ondan geri ala bilmirlər. Buna görə də yaxın günlərdə evləri başlarına yıxılan həmin ailələr bir sıra dövlət qurumları, eləcə də FHN qarşısında etiraz aksiyası keçirməyi planlaşdırır.

Məlumat üçün qeyd edək ki, Ruslan Əliyev haqqında bundan öncə də mediada çoxsaylı məlumatlar yer alıb. Həmin məlumatlarda qeyd olunur ki, Ruslan Əliyev şəxsi maraqlarını təmin edən şəxslərin işıq, su, qaz və s. kimi xətlərin, boruların yaxınlığında, hətta onların üzərində iş aparmasına göz yumur”"".

Mövzu ilə bağlı araşdırmamız davam edir.