Azərbaycanın Rusiyanın Sankt-Peterburq şəhərində baş konsul vəzifəsində çalışmış Sultan Qasımovla bağlı sensasion məlumatlar əldə edilib.
Sultan Qasımov diplomatik fəaliyyətə ilk olaraq 2009-cu ildə Rusiyanın Yekaterinburq şəhərində baş konsul olaraq başlayıb. Qasımov 2016-cı ildən 2024-cü il oktyabr ayının 21-nə qədər Rusiyanın Sankt-Peterburq şəhərində baş konsul olaraq diplomatic fəaliyyətinə davam edib.
Etibarlı mənbənin verdiyi məlumata görə, bu müddət ərzində Sultan Qasımov bir sıra xoşagəlməz hadisələrdə ciddi problemlərlə üz-üzə qalıb.
Müxtəlif şəxslərdən aldığı borc nəticəsində yaranan qalmaqallar Sultan Qasımov haqqında şikayətlərin və narazılıqların formalaşmasına gətirib çıxarıb. Hazırda Sultan Qasımovun 500 min dollardan çox borcunun olduğu deyilir. Bu borcun qumarla bağlı olduğu deyilsə də əslində külli miqdarda borc vəsaitinin Sultan Qasımovun Rusiyanın Yekaterinburq şəhərində baş konsul vəzifəsində çalışdığı dövrdən toplandığı bildirilir.
Məlumata görə Sultan Qasımov vəzifəsindən və qardaşının nüfuzundan istifadə edərək ayrı-ayrı şəxslərə görüləcək işlərlə bağlı müxtəlif vədlər verərək külli miqdarda vəsaitlər alıb. İllərlə toplanan borc isə 500 min dolları keçib.
Pullarını geri istəyən şəxslərin etiraz və şikayətlərinin qarşısı isə Sultan Qasımovun yüksək vəzifədə çalışan qardaşı Azər Qasımov tərəfindən ört basdır edilib və o Sultan Qasımovu qorumağa müvəffəq olub.

Zamanla şikayətçilərin hüquq-mühafizə orqanlarına müraciəti və tələbi baş verənlərlə bağlı məlumatların gizlədilməsini mümkünsüz edib. Sultan Qasımovun bu hərəkətləri qardaşının da iş fəaliyyətinə mənfi təsirsiz ötüşməyib. Son məqamda Azər Qasımov bir sıra məsələlərdə geri çəkilməli olduğunu deyib.
Məlumatda isə bildirilir ki, Sultan Qasımovdan şikayət edən şəxslərdən biri ilə daha ciddi münasibəti onun üçün baş ağrısına çevrilib.
Sultan Qasımovun sabiq Baş nazir Novruz Məmmədov və Cinayət Məcəlləsinin bir sıra maddələri ilə ittiham olunaraq 2016-cı ildə 15 il müddətinə həbs olunan Beynəlxalq Bankın İdarə Heyətinin sabiq sədri Cahangir Hacıyevlə də sıx ailəvi dostluq münasibətləri olub.

Hətta bəzi görüşlərdə Sultan Qasımov Rusiyada səfir olmaq arzusunu da dilə gətirirmiş.
Hazırda Sankt-Peterburqla sıx əlaqələrini davam etdirən Sultan Qasımovun tez-tez Rusiyaya gedib gəldiyi bildirilir.

Xatırladaq ki, Sultan Qaısmovun qardaşı Azər Qasımov bir müddət öncə komandası ilə birlikdə vəzifəsini itirib.
Məsələ ilə bağlı qarşı tərəfin fikirlərini öyrənmək cəhdlərimiz boşa çıxdı(ajans.az)
Qarşı tərəfin fikirlərini işıqlandırmağa hazırıq.