Əvəz Zeynalı: “Onlar mənim ömrümü tərsinə yazan adamlardır, amma gec də olsa cəzalarını alacaqlar”

Tanınmış jurnalist Əvəz Zeynalı öz sosial platformasında keçmiş Prezident Administrasiyasının rəhbəri Ramiz Mehdiyev və onun yaxın silahdaşı Əli Həsənovla bağlı sərt fikirlər səsləndirib.

Jurnalist bildirib ki, bu iki şəxs Azərbaycan müstəqil mediasına ən ağır zərbələri vuran, azad sözün boğulmasında əsas rol oynayan insanlardandır:

✔️ “Ramiz Mehdiyev öz komandası və Azərbaycan müstəqil mediasını ağlar günə qoyan xas adamı Əli Həsənovla birlikdə mənim ömrümü tərsinə yazan adamdır,” – deyə Əvəz Zeynalı qeyd edib.

O, paylaşımında həmçinin Ramiz Mehdiyevin hazırda ciddi ittihamlarla üzləşdiyini də vurğulayıb:

✔️ “Ankaraya enən kimi eşitdim ki, ‘vətənə xəyanət’ və ‘dövlət çevrilişinə cəhd’ maddələri ilə ev dustaqlığına məhkum edilib. Bu haqda təbii ki, danışacağam. Zatən Azərbaycanı de-fakto idarə etdikləri o qaranlıq zamanlarda od olub başlarına yağmışam.”

Zeynalı yazısında qeyd edib ki, 2011-ci il “Xural” qəzetinin bağlanması və onun həbsi ilə nəticələnən proseslərdə Mehdiyev və Həsənovun birbaşa rolu olub. O, həmin dövrdə məhkəmələrdə bu şəxslərin şahid kimi işə cəlb olunması ilə bağlı bir cildlik vəsatət təqdim etdiyini də xatırladıb.

✔️ “Kimsə yaşatdıqlarını yaşamadan ölməz. 2013-cü ildə Ramiz Mehdiyevin ad gününə həsr etdiyim yazıda ona 150 il ömür arzulamışdım ki, yaşa, başına gələcəkləri gör,” – deyə jurnalist ironik şəkildə əlavə edib.

Əvəz Zeynalı hesab edir ki, uzun illər dövlətin əsas strukturlarını nəzarətdə saxlayan və milli-vətənpərvər kəsimə qarşı sistemli təzyiqlər göstərən bu şəxslər gec də olsa cavab verməlidirlər:

✔️“Azərbaycanın belini qıran, milli vətənpərvər kəsimin qənimi olan bu adamlar çox gec də olsa cəzalarını almalıdır. Allah bir gün mıxı mismar edir, görürsənmi? O birilər də görəcək.”

Jurnalistin paylaşımı ictimaiyyətdə geniş rezonans doğurub. Bir çox sosial media istifadəçiləri Zeynalının illər əvvəl səsləndirdiyi fikirlərin bu gün reallığa çevrildiyini qeyd ediblər.

Əvəz Zeynalı sonda yazısını belə bitirib:

✔️ “Allah Allah... Allah Allah... Allah Allah...”