SOCAR-ın investisiya departamentinin sabiq rəisi, həbsdə olan biznesmen Adnan Əhmədzadənin işi onun yaxın adamının media karyerasını bitirmək üzrədir.
SIYASET.INFO - a verilən xəbərə görə, Əhmədzadənin media işlərini kurasiya etmiş Global Media Group rəhbəri Elnur Abdullayevin "qələmi qırılıb". Gələn informasiyalarda deyilir ki, Adnan Əhmədzadənin həbsindən sonra Elnur Abdullayev media kuratorluğundan məhrum edilir. Eyni zamanda, Əhmədzadəyə bağlı Baku TV -nin, eləcə də digər media resurslarının rəhbərliyində dəyişikliklər gözlənilir. Hakimiyyət mediaya nəzarət prosesini təmərküzləşdirir və çoxqütblü nəzarət siyasətinə son qoyur. Çünki son illərdə bu yanaşmanın tətbiqi özünü doğrultmayıb. Nəticədə ayrı-ayrı qrupların himayəsi altında fəaliyyət göstərmək hakimiyyətə mediaya kontrolda çətinlik yaradıb. Ona görə də ən yaxşısı bir əldən idarəetmə mexanizmidir. Bu səbəbdən, Əhmədzadə - Abdullayev tandeminin himayəsi altında olan media qrup tamamilə əl dəyişir. Bu da Elnur Abdullayev dönəminin başa çatması deməkdir. Bunun ardınca onun Əhmədzadə ilə birlikdə fəaliyyəti, həmçinin mediaya ayrılan maliyyənin mənimsənilməsi şübhələri araşdırıla bilər. Yada salaq ki, Elnur Abdullayev sabiq nazir Ziya Məmmədovun dönəmində Nəqliyyatın İntellektual İdarəetmə Sistemi və Dövlət Avtomobil Nəqliyyat Xidməti kimi gəlirli postlara rəhbərlik edib. Onun birdən-birə "media patronuna” çevrilməsi də elə bundan sonra başlayıb. Azərbaycanda bir sıra saytları "satın" alan Elnur Abdullayev Türkiyədə "Haber Global” telekanalını qurub.
Sonrakı dönəmə diqqət edək: Azərbaycanda nisbətən İP-si çox olan saytlara qarmaq atıldı. Onlarla aparılan danışıqların məzmunu beləydi ki, saytlar 51-49 faiz pay bölgüsü ilə satılır Elnur Abdullayevin özünün kurasiyasında olan şirkətə. Bu minvalla Azərbaycanda bir çox saytlar satın alınaraq Elnur Abdullayevin kurasiyasına keçib.
Yəni faktiki olaraq həmin saytların sahibi 51 faizlik payla Elnur Abdullayevdir. İndisə Əhmədzadə işi bu səhmlərin Abdullayevdən alınması prosesinə start verməklə nəticələnib.

Azər Talıbov
Siyaset.info