“AzerGold” QSC Naxçıvan Muxtar Respublikasının mineral-xammal potensialının öyrənilməsi və perspektivli faydalı qazıntı yataqlarının müəyyənləşdirilməsi məqsədilə Birləşmiş Ərəb Əmirliklərinin “International Resources Holding” (IRH) şirkəti ilə əməkdaşlığa başlayır.

BNTV.az-a verilən məlumata görə, əməkdaşlıq çərçivəsində Naxçıvan ərazisində, ilk növbədə, strateji əhəmiyyət daşıyan və iri miqyaslı kritik metal perspektivlərinin müəyyənləşdirilməsi və qiymətləndirilməsi istiqamətində birgə geoloji kəşfiyyat işlərinin aparılması nəzərdə tutulur.

Bu məqsədlə “AzerGold” QSC ilə IRH şirkətinin törəmə müəssisəsi olan “Terra Mining Ltd” arasında “Azərbaycan Respublikasının Naxçıvan Muxtar Respublikası ərazisində mineral-xammal potensialının və mədən sahələrinin birgə qiymətləndirilməsi və kəşfiyyatı haqqında Saziş” imzalanıb.

Sənəd 14 sentyabr 2026-cı il tarixində Azərbaycan Respublikasının Prezidenti İlham Əliyevin və Əbu-Dabi Əmirliyinin hakiminin müavini, milli təhlükəsizlik müşaviri Şeyx Tahnun bin Zayed Al Nəhyanın iştirakı ilə iki ölkə arasında bir sıra sənədlərin imzalanması mərasimi çərçivəsində rəsmiləşdirilib.

Sazişi “AzerGold” QSC-nin İdarə Heyətinin sədri Zakir İbrahimov və IRH-in Baş icraçı direktoru Əli Rəşid Əl-Rəşdi imzalayıblar.

Əməkdaşlıq çərçivəsində işlərin mərhələli şəkildə həyata keçirilməsi planlaşdırılır. İlkin mərhələdə mövcud geoloji məlumatların təhlili, müasir geoloji kəşfiyyat və tədqiqat metodlarının tətbiqi, perspektivli sahələrin və potensial hədəflərin müəyyənləşdirilməsi nəzərdə tutulur.

İlkin axtarış və qiymətləndirmə işlərinin nəticələri müsbət olduğu halda növbəti mərhələdə daha dəqiq kəşfiyyat işləri aparılacaq. Bundan sonra isə birgə hasilat imkanları və bu istiqamətdə əməkdaşlığın gələcək perspektivləri müzakirə ediləcək.

Qeyd edək ki, IRH mədən aktivlərinin qiymətləndirilməsi və inkişafı sahəsində beynəlxalq təcrübəyə malikdir. Şirkət hazırda Afrika, Cənubi Asiya və Yaxın Şərq regionlarında fəaliyyət göstərir.

IRH-in texniki və investisiya imkanlarının “AzerGold”un təcrübəsi ilə birləşdirilməsinin Naxçıvanın mineral-xammal potensialının müasir beynəlxalq yanaşmalar əsasında daha dərindən öyrənilməsinə əlavə imkanlar yaradacağı bildirilir.

“AzerGold” və IRH arasında əməkdaşlığın gələcəkdə Naxçıvanda yeni investisiya imkanlarının formalaşmasına, mədən sənayesində əlavə dəyərin və məşğulluğun artmasına, regionun iqtisadi fəallığının genişlənməsinə və Azərbaycanın qeyri-neft sektorunun inkişafına töhfə verəcəyi gözlənilir.