Respublika Perinatal Mərkəzində baş verən yanğınla bağlı məhkəmə prosesi davam etdirilib.

"Unikal"ın məlumatına görə, Bakı Ağır Cinayətlər Məhkəməsinin hakimi Leyla Əsgərova-Məmmədovanın sədrliyi ilə keçirilən proses təqsirləndirilən Mehriban Abasquliyeva ifadəsi ilə davam etdirilib.

O bildirib ki, 2024-cü ilin ölkəmizdə perinatal mərkəzlərdə çarpayı az olduğu halda xəstə sayı çox olub.

"Belə ki, 2024-cü ilin 9 yanvar statistikasına nəzər salsaq Qubada 6 çarpayı olduğu halda xəstə sayı 10, Sabirabadda 5 çarpayı olduğu halda xəstə sayı 5, Sumqayıtda 10 çarpayı olduğu halda, xəstə sayı halda 14, Bakıda 20 çarpayı olduğu halda, xəstə sayı 34 və Lənkəranda 10 çarpayı olduğu halda, xəstə sayı 8 nəfər olub.

10 bal toplamaq üçün müraciətlərin sayını gün ərzində 2001-ə çatdırım. Bu isə qeyri mümkündür. Guya mən qanunsuz yollarla rəhbərlikdə reputasiyamı qaldırmaq və əlavə gəlir əldə etmək niyyətim olub. Nə istintaq nə də şahid ifadələrində yoxdu ki, stasionar cərrahi əməliyyatlarının sayını artırmışam. Belə bir səlahiyyət mənim deyil, perinatal mərkəzin rəhbəri Dilarə Şirinovanındır".

M. Abasquliyeva bildirib ki, o "Respublika Perinatal Mərkəzi" Publik Hüquqi Şəxsin direktoru təyin edilənə qədər Mərkəzdə 47 küvez var idi:

"Bir çox işlərimə görə mənə çox sağol demək əvəzinə, hazırda məni guya süni qaydada Perinatal Mərkəzdə stasionar müalicə alan xəstələrin sayının artırılmasında və Mərkəzə artıq xəstələrin qəbul edilməsində qanunsuz və əsassız ittiham edirlər. 2023-cü ilin yanvar ayında İcbari Tibbi Sığorta üzrə Dövlət Agentliyi tərəfindən Mərkəzə əlavə olaraq daha 10 inkubator-küvez verilmişdir, həmin ilin iyul ayında isə Koreyanın səfirliyi daha 4 küvez Perinatal Mərkəzə bağışlayıb. Yenidoğulmuşların intensiv terapiya bölməsində cəmi 20 çarpayı yeri nəzərdə tutulub. Çarpayı yerlərinin azlığına görə mən ağır vəziyyətdə olan yenidoğulmuşları müalicə üçün Mərkəzə qəbul etməməliydimsə, onda nə üçün 20 çarpayı yerə 2 dəfə çox küvez ola-ola

Mərkəzə əlavə olaraq daha 14 küvez verilmişdir? Respublika Perinatal Mərkəzində xəstələrin müalicəsi və müalicə üçün istifadə olunan cihaz və avadanlıqların yerləşdirilməsinə cavabdeh şəxs mən yox, Mərkəzin Baş həkimi Dilarə Şirinova, müvafiq şöbə və bölmə müdirləridir. Xəstələri hansı palatalarda yerləşdirmək və onların müalicəsi üçün hansı cihazlardan və avadanlıqlardan istifadə etməyi onlar və həkimlər müəyyən edirlər. Bu barədə mənə heç məlumat verilmir".

Məhkəmənin növbəti iclası martın 11-nə təyin edilib.

Qeyd edək ki, bu il yanvarın 9-da Respublika Perinatal Mərkəzində PHŞ-nin inzibati binasında baş vermiş yanğınla bağlı Baş Prokurorluqda Cinayət Məcəlləsinin müxtəlif maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.

İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Bundan başqa, Mehriban Abasquliyevanın 2022-ci il dekabrın 27-də Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.

Eyni zamanda istintaqla Fövqəladə Hallar Nazirliyi (FHN) tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapeya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.

Orxan Rasifoğlu