Oğuz rayonunun Bucaq kəndi ərazisində yerləşən evlərin birindən televizor, mağazadan tütün məmulatları və pul oğurlanıb, eləcə də bir ünvandan oğurluğa cəhd olunub. Naməlum şəxslər daha sonra kənd sakininə məxsus “Mercedes” markalı avtomobili qaçırıblar.

DİN-in Mətbuat Xidmətinin Şəki regional qrupundan verilən məlumata görə, polis əməkdaşları tərəfindən hadisə yerlərinə baxış keçirilib və qısa zaman ərzində cinayət hadisələrini törədən şəxslərin kimliyi müəyyən olunub. Keçirilmiş əməliyyat-axtarış tədbirləri nəticəsində oğurluqları etməkdə şübhəli bilinən üç nəfər, əvvəllər də dəfələrlə eyni əmələ görə məhkum olunmuşlar-Elbrus Həsənov, Araz Hüseynov və Hümmət Məmmədov saxlanılıb. Araşdırma zamanı məlum olub ki, oğurluq məqsədilə Bakı şəhərindən Oğuza gələn dostlar burada niyyətlərini həyata keçirdikdən sonra “Mercedes” markalı avtomobili qaçıraraq Bakı şəhərinə gediblər. Onların qaçırdıqları nəqliyyat vasitəsinin yeri paytaxtda müəyyən olunaraq istintaqa təhvil verilib.

Qeyd edək ki, saxlanılan şəxslər müxtəlif cinayətlər etdikləri üçün əvvəllər məhkum ediliblər və cəzaçəkmə müəssisəsində tanış olublar. Azadlığa çıxandan sonra isə yenidən birlikdə oğurluqlar ediblər.

Faktla bağlı polis şöbəsində cinayət işi başlanılıb, hər üç şəxsin digər cinayətlərdə iştirakının olub-olmamasının müəyyən edilməsi məqsədilə zəruri istintaq hərəkətləri davam etdirilir.

Sinxron- Elbrus Həsənov (saxlanılan şəxs )
Sinxron- Hümmət Məmmədov (saxlanılan şəxs )