Britaniyanın Şimali Yorkşir qraflığındakı Ellerbi kəndinin sakinləri 18-ci əsrə aid evlərində mətbəxi yenidən bəzəmək qərarına gəliblər və 250 min funt-sterlinq dəyərində 264 köhnə qızıl sikkədən ibarət xəzinə tapıblar.


bakunews.az milli.az-a istinaden bildirir ki, bu barədə "Daily Mail" məlumat yayıb.

Adları açıqlanmayan evin sahibləri on ildən artıqdır ki, orada yaşayıblar və mətbəxdə döşəməni yenidən qoymağa qərar veriblər. Cütlük döşəmənin altından yaşı 400 ilə qədər olan sikkələrlə dolu köhnə fincan tapıblar. Xəzinə 15 santimetr dərinlikdə olub. Əvvəlcə ev sahibləri fincanı köhnə elektrik kabelinin elementi ilə səhv salsalar da, sonra sikkələri görüblər.

Diqqətlə araşdırdıqda məlum olub ki, sikkələr 1610-1727-ci illərə aiddir və İngiltərə kralları I Yakov, I Karl və I Corc dövründə düzəldilib.

Britaniyalılar Londondakı Spink & Son hərrac evi ilə əlaqə saxlayıb, o, tapıntını qiymətləndirmək üçün ekspert göndərib. Məlum olub ki, sikkələr çox güman ki, dəmir filizi, taxta və kömür ticarəti ilə məşğul olan Kinqston-apon-Hall şəhərindən olan nüfuzlu Fernli Meyster ailəsinə məxsusdur. 1700-cü illərin əvvəllərində onun bəzi nümayəndələri siyasətlə məşğul idilər və hətta parlamentin üzvləri də olublar.

Sikkələr Josef Fernli və onun həyat yoldaşı Sara Meyster dövründə toplanıb. Fernli 1725-ci ildə ölüb və dul arvadı ömrünün qalan hissəsini Ellerbidə keçirib və 1745-ci ildə 80 yaşında ölüb.

Ümumilikdə tapılan sikkələr 250 min funt sterlinq dəyərində qiymətləndirilib. Hərracçı Qreqori Edmund tapıntını son dərəcə vacib adlandırıb və qeyd edib ki, ingilis qızıl sikkələrinin dəfinələri nadir hallarda satışa çıxarılıb. "Bu 260 sikkə Britaniyadakı ən böyük arxeoloji tapıntılardan biridir", - o deyib.

bakunews.az