Azərbaycanın ərazi bütövlüyünün və suverenliyinin tam bərpasından sonra qarşıda duran ən mühüm məsələlərdən biri ruhi, yəni əqli və mənəvi mədəniyyətimizin inkişafıdır.

Qeyri-Hökumət Təşkilatlarına (QHT) Dövlət Dəstəyi Agentliyinin Müşahidə Şurasının sədri, professor Fuad Məmmədov AMEA-da “Azərbaycan dilinin təmizliyi: milli əmanətin qorunması uğrunda səfərbərlik” mövzusunda keçirilmiş müşavirədə çıxışı zamanı belə deyib.

O, müasir dövrdə Azərbaycan elmində ən vacib məsələlərdən birinin dil problemi olduğunu vurğulayıb. Bildirib ki, dil hər bir millətin mədəniyyətinin əsas sütunu və milli-mədəni kimliyinin başlıca daşıyıcısıdır. Dünyanın müxtəlif ölkələrində yaşayan milyonlarla azərbaycanlını birləşdirən əsas amillərdən biri məhz ana dilidir. Azərbaycan dilinin gücləndirilməsi və inkişaf etdirilməsi beynəlxalq miqyasda xalqımıza qarşı hörmət və məhəbbətin artmasına mühüm töhfə verəcək.

Agentliyin Müşahidə Şurasının sədri çıxışında dilin cəlbedici və güclü təsirə malik amil olaraq dünya miqyasında mühüm əhəmiyyət kəsb etdiyini bildirib: “Həqiqətən də, dilimiz çox zəngin və ahəngdardır. Biz Cənab Prezidentin dilimizin qorunması və inkişafı ilə bağlı qarşıya qoyduğu vəzifələri həyata keçirərək onun inkişafına töhfə verməli, səylərimizi birləşdirərək milli mədəniyyətimizi daha da yüksəltməliyik”.

Professor Fuad Məmmədov qeyd edib ki, Ulu Öndər Heydər Əliyevin milli mədəniyyətimiz və dilimizin tərəqqisi ilə bağlı dəyərli fikirləri, tövsiyələri bu gün də çox aktualdır. Ümummilli Lider demişdir ki, “yüksək ruhi, əqli və mənəvi mədəniyyətə malik olmayan bir xalqın gələcəyi yoxdur. Xalq yalnız ziyalıları, elmi potensialı və mədəniyyəti ilə tanınır”. Bu baxımdan dövlət qurumları, elmi müəssisələr, qeyri-hökumət təşkilatları və vətəndaş cəmiyyətinin nümayəndələri birgə fəaliyyət göstərməli, dövlət siyasətinin həyata keçirilməsinə dəstək verməli, ölkəmizin hərtərəfli və mütərəqqi inkişafını təmin etməlidir.

Milli mədəniyyətimiz və kimliyimizin qorunub saxlanması üçün Azərbaycan dilinin hərtərəfli inkişafının son dərəcə vacib olduğunu vurğulayan professor Fuad Məmmədov Azərbaycan xalqının həyat keyfiyyətinin, rəqabət qabiliyyətinin yüksəldilməsi və dövlətimizin güclənməsinə xidmət edən əqli, yəni intellektual və mədəni inkişafın müasir dövrün tələbi olduğunu bildirib.

Sədrin sözlərinə görə, insan kapitalı böyük qüvvədir və onun nüvəsini yüksək mədəniyyətə malik Azərbaycan vətəndaşları təşkil edir ki, bu da biliyi, bacarığı, mənəviyyatı və yaradıcı fəaliyyəti yüksək səviyyədə olan insan resurslarının yetişdirilməsini tələb edir. Professor Fuad Məmmədov Azərbaycan dilinin hərtərəfli inkişafını bu prosesin əsas şərti kimi qiymətləndirərək əlavə edib ki, dil strateji, tükənməyən və yenidən hasil olunan resurs kimi xalqın davamlı, təhlükəsiz və mütərəqqi inkişafını təmin edir.

O, çıxışının sonunda bildirib ki, ölkəmizin ən qüdrətli dövlətlər sırasına daxil olması üçün intellektual əməyin, mədəniyyətin inkişafının dünya standartları səviyyəsində qorunması, eləcə də idarəetmə mədəniyyətinin yüksək səviyyəyə çatdırılması Azərbaycan cəmiyyəti və elminin qarşısında duran mühüm vəzifələrdəndir.