“Kontakt Home” köhnə məhsullar satır “Şeş-Qoşa” layihəsi ifşa edildi - VİDEO, FOTO
“Kontakt Home” mağazalar şəbəkəsi yenidən müştəri şikayətləri ilə gündəmə gəlib. BNTV.az Bakupost.a-a istinadən xəbər verir ki, alıcılar mağazada satılan bəzi məhsulların öncədən istifadə edildiyini iddia edirlər.
Belə iddialardan biri Aybəniz Ramazanova adlı istifadəçinin sosial şəbəkədə paylaşımında yer alıb. O bildirib ki, “Şeş-Qoşa” kampaniyası çərçivəsində endirimlə aldığı telefonun artıq istifadə edildiyini sonradan aşkar edib.
Onun sözlərinə görə, cihazı aktiv edərkən son avtomatik yaddaş təmizlənməsinin 116 gün əvvəl – 9 dekabr 2025-ci ildə həyata keçirildiyi barədə bildiriş görünüb:
“Sizin etdiyinizin adı nədir? Köhnə, işlənmiş telefonu kiməsə sırımaq nədir? Bu neçənci haldır? “Şeş-Qoşa” kampaniyası da ona görədir ki, köhnə telefonları satanda geri qaytarılma olmasın? Dünən hədiyyə üçün alınmış telefondur. Bu gün aktiv edəndə belə halla üzləşdik”.
Şikayətçi bildirib ki, məhsulu geri qaytarıb və mağaza tərəfindən ona bunun “zavod qüsuru” olduğu bildirilib.
Paylaşımın şərh bölməsində digər istifadəçilər də oxşar hallarla üzləşdiklərini yazıblar. Onlar iddia edirlər ki, geri qaytarılan problemli məhsullar yenidən satışa çıxarılır.
Cavid Mirzəliyev adlı istifadəçi yazıb:
“Bu qədər şikayət var, geri qaytarılan mallar var. Belə mallar məhv edilmir. Kimi aldada bilsələr, ona satırlar. Onsuz da Azərbaycanda insanların çoxu haqqını tələb etmir və ya edə bilmir. Onlar da bundan istifadə edirlər”.
Xanım Qurbanova isə noyabr ayında aldığı telefonda əvvəl istifadə izlərinin olduğunu bildirib:
“Açılış tarixi avqust göstərirdi, üstəlik çəkilişində də problem var idi. Neçə dəfə apardım, dedilər, belə olur”.
Digər bir istifadəçi Cəlil Cəlil televizor alarkən oxşar vəziyyətlə qarşılaşdığını qeyd edib:
“Televizor almışdım. Bolt yerlərinə baxdım, gördüm yeyilib. Baxmasaydım, problemi gizlədəcəkdilər. Sən demə, cihaz təmirdə olub. Sonradan özləri də təsdiqlədilər. Təxminən 3 saat gözlədikdən sonra normal, zavod qablaşdırmasında olan televizor gətirdilər”.
Aysel Yusup adlı istifadəçi isə belə yazır:
“Oradan alış-veriş etmək peşmanlıqdır. Telefon almışdım, zavod qüsuru var idi, enerji yığmırdı. Dedilər ki, guya düzgün qoşmuram. Sanki ilk dəfə telefon görürəm. Güclə qaytara bildim”.
Nigar Şirin adlı izləyici də oxşar problemlə üzləşdiyini qeyd edib:
“Mart ayında münasib qiymətə telefon almışdım. Amma cihaz tez-tez donurdu. Əlaqə saxladım, dedilər ki, Wi-Fi aktiv edilibsə, qaytarılmır. Sonradan başa düşdüm ki, bu, onlar üçün normal hal sayılır”.
Məsələ ilə bağlı “Kontakt Home” mağazalar şəbəkəsinin mövqeyini dərc etməyə hazırıq.
Maraqlıdır ki, “Kontakt Home” mağazalar şəbəkəsi ilə bağlı oxşar şikayətlər son dövrlər demək olar ki, hər gün mətbuatda və sosial şəbəkələrdə yer alır.
Buna baxmayaraq, şirkətin bu iddialara münasibəti və ya ictimaiyyətə açıq izahları müşahidə olunmur.
Bu isə suallar yaradır:
- “Kontakt Home” niyə bu qədər geniş yayılmış narazılıqlara reaksiya vermir?
- İstehlakçıların iradları niyə aradan qaldırılmır?
- Şirkət ictimai rəyə və tənqidlərə qarşı məsuliyyət hiss edirmi?
Müştəri məmnuniyyətinin əsas göstərici sayıldığı bir dövrdə bu cür şikayətlərin davamlı xarakter alması və cavabsız qalması ciddi narahatlıq doğurur.
Əlaqə whatsapp:+994 70 402 02 85
BakuNews.az
