Bakunews.az xəbər verir ki, təhsil eksperti və jurnalist Sakit Muradov sosial şəbəkə hesabında maraqlı və tənqidi mövqe ilə çıxış edərək son günlər Təhsil naziri Emin Əmrullayevin siyasətinə yönəlmiş intensiv tərif dalğasına münasibət bildirib.

Sakit Muradovun sözlərinə görə, dünənədək susaraq kənardan müşahidə edən şəxslərin indi birdən-birə islahatlara övgü yağdırması heç də təsadüfi deyil:

“Yeni sistemlər – OTK-nın ölkə üzrə tətbiqi, köhnə münasibət şəbəkələrinin dağılması, dost-tanış dəstəyinin gücsüzləşməsi və yeni qiymətləndirmə meyarları – bir çox şəxsi maraqlara toxunub. Ona görə də bu gün sabah toxunulmaz qalmaq üçün qorxu zəminində təriflər artır”, – deyə ekspert qeyd edib.

Muradov bildirib ki, əvvəllər qeyri-rəsmi “tanışlıq üstünlükləri” və köhnə oyun qaydaları ilə fəaliyyət göstərən kurs biznesləri bu dəyişikliklər fonunda çətinliklə üzləşib. Artıq vəziyyəti itirməkdən qorxanlar sistemə sadiqlik nümayiş etdirmək yolunu seçiblər.

“Bu təriflər tənqidə əsaslanmır, qorxuya əsaslanır. Bu, peşəkar yanaşma deyil – sadəcə şəxsi taleyi qoruma instinktidir”, – deyə Sakit Muradov vurğulayıb.

Qeyd edək ki, son zamanlar təhsil sahəsindəki islahatlar ictimai və ekspert dairələrində ciddi müzakirə mövzusudur. Xüsusilə qiymətləndirmə, təyinat və nəzarət mexanizmlərindəki yeniliklər müxtəlif təbəqələrdə birmənalı qarşılanmır.