Dağlıq Şirvan Regional Təhsil İdarəsinin müdiri Ramin Abasov “Əlaçı” televiziya layihəsinin final mərhələsinin qalibi olan İsmayıllı şəhər 6 nömrəli tam orta ümumtəhsil məktəbinin XI sinif şagirdi Mitəlov Tural Vüqar oğlu və onun valideyni ilə görüşüb.

İsmayıllı şəhər 6 nömrəli tam orta ümumtəhsil məktəbində keçirilən görüşdə Regional İdarənin müdir müavini Rahim Novruzov, İsmayıllı Rayon Təhsil Sektorunun müdiri Rəşid Məmmədov, Elm və Təhsil İşçiləri Həmkarlar İttifaqı İsmayıllı rayon komitəsinin sədri Hafiz Kərimov, İsmayıllı şəhər 6 nömrəli tam orta ümumtəhsil məktəbinin sabiq direktoru, əməkdar müəllim Qalib Bəşirov və məktəb rəhbərliyi iştirak etmişdir.

Tural Mitəlov uğur qazanmasını qarşısında məqsəd qoyaraq buna görə xeyli çalışdığını, məktəbdə keçirilən intellektual yarışlarda mütamadi olaraq iştirak etdiyini bildirmişdir. Onun bu uğurunda müəllimlərinin və məktəbdə keçirilən intellektual yarışların böyük rolu olduğunu qeyd etmişdir. Həmçinin o ali məktəblərə qəbul imtahanına ciddi şəkildə hazırlaşdığını və ürək cərrahı olmaq arzusunda olduğunu bildirmişdir.

İdarə müdiri Ramin Abasov Tural Mitəlovu "Təşəkkürnamə" və hədiyyə ilə təltif edərək onu təbrik etmiş, ona gələcək fəaliyyətində və təhsil həyatında uğurlar arzulamışdır. Eyni zamanda idarə müdiri tərəfindən şagirdin sinif rəhbəri və valideynləri də "Təşəkkürnamə" ilə təltif edilmişdir.