Bakunews.az-a daxil olan məlumat cəmiyyətimizin utanc yeri ola biləcək bir faktı üzə çıxarır. Balakən rayonunun Qullar kəndi ərazisində yerləşən 2 mərtəbəli yaşayış binasında kanalizasiya suları birbaşa insanların yaşadığı həyətə axıdılır. Bu təkcə antisanitariya deyil, həm də dövlətin və yerli qurumların vətəndaşa münasibətinin acı göstəricisidir.

Ən dəhşətlisi odur ki, bu binada Vətən uğrunda canını fəda etmiş iki şəhidimizin ailəsi yaşayır. Amma görünən odur ki, nə bu ailələrin statusu, nə də yaşayış şəraiti məmurların vecinə deyil. Sakinlər dəfələrlə şikayət etsə də, nəticə sıfır. Qapılar üzlərinə bağlanır, cavab verən yoxdur. Sanki dövlət qurumları problem həll etmək üçün deyil, susmaq üçün fəaliyyət göstərir.

Mənzil-Kommunal İstismar Sahəsinə (MKİS) edilən müraciətlər də eynilə nəticəsiz qalıb. Bu qurumun vəzifəsi binanın xidmətini təşkil etmək olduğu halda, öz öhdəliklərindən boyun qaçırır. Qurumlar ya məsuliyyət daşımaq istəmir, ya da vətəndaşı adam yerinə qoymur. Axı bu qədər etinasızlıq nəyə xidmət edir?

Nəyə görə ölkənin hər yerində şəhid adından reklam kimi istifadə edən qurumlar real problemlərə gələndə susur? Kanalizasiya suyu şəhid ailələrinin qapısına axır, amma məsul qurumlar kabinetlərindən çıxmağa belə ehtiyac duymur.

Bu nə dövlətdir ki, öz şəhidinə sahib çıxmır?

Bakunews.az olaraq sual edirik: Aidiyyəti qurumlar, o cümlədən Balakən Rayon İcra Hakimiyyəti və MKİS bu məsələyə nə vaxt cavab verəcək? Yoxsa bu biabırçı vəziyyətin də üstündən sükutla keçəcəksiniz?

Cəmiyyət cavab gözləyir. Səssiz qaldıqca məsuliyyət daha da ağırlaşır.

Məsələ ilə bağlı əməkdaşlarımız Balakən rayonunun Qullar kənd Bələdiyyəsi ilə əlaqə saxlayıb. Azər bəyə müraciətimiz zamanı o bildirik ki, qeyd edilən ərazi Mənzil İstismar Sahəsinin balansındadır və məsələ ilə bağlı xahiş edirəm MİS- rəhbərliyinə müraciət edin. Qeyd edilən kimi MİS rəisi Ramin müəllimlədə əlaqə saxlanılıb. Ramin müəllim bildirir ki, qeyd edilən ərazi onun balansında deyil. Ərazidə olan yaşayış binası bizim balansımızdadır. Və bizim öncəliyimiz yaşayan sakinlərin başına yağış sularının tökülməməsidir. Ramin müəllim eyni zamanda bildirib ki, qeyd edilən binanın qarşısında kanalizasiya xəttlərinin bərpası və yaranan çirkab suların aradan qaldırılması iki gün ərzində həll ediləcəkdir. Məsələ ilə bağlı verilən sözlərə etimad edərək media olaraq əhalinin sosial problemini diqqətimizdə saxlayacağıq.