Bakunews.az redaksiyasına Rusiyanın Rostov-na-Donu şəhərində yaşayan Türkiyə vətəndaşı, memar M.Salim OK tərəfindən ciddi iddialar əks etdirilən müraciət daxil olub. Müraciətdə bildirilir ki, o, İran əsilli və Binəqədi rayonu ərazisində yaşayan Aqbar Ghorbani tərəfindən 60.000 ABŞ dolları məbləğində aldadılıb və bu vəsaiti uzun illərdir geri ala bilmir.

Müraciət müəllifi qeyd edir ki, məsələ ilə bağlı Aqbar Ghorbani barəsində Azərbaycan məhkəməsi qərar çıxarmış, lakin qarşı tərəf qanuni müddət ərzində etiraz etmədiyi halda, bir ildən çox vaxt keçdikdən sonra Apellyasiya şikayəti verərək prosesi uzatmağa çalışıb. M.Salim OK bildirir ki, bu şikayət qəbul edilib və bu da hüquqi olaraq anlaşılmazlıq doğurur.

Bundan əlavə, vətəndaş qeyd edir ki, Binəqədi Rayon İcra Şöbəsində Aqbar Ghorbani borcunu rəsmi şəkildə qəbul edərək may ayından ödəməyə başlayacağına dair yazılı öhdəlik götürsə də, hələ də heç bir ödəniş həyata keçirməyib. Əksinə, borca yenidən qanunsuz şəkildə etiraz edərək məsələni süründürməçiliyə salıb.

M.Salim OK bu prosesin Azərbaycan ədliyyəsinə və dövlətinə qarşı etimadsızlıq deyil, əksinə, bu cür halların ədalətli araşdırılmamasına, vəzifəli şəxslərin laqeydliyinə yönəlik narazılıq olduğunu vurğulayır. O, Azərbaycan dövlətinə inandığını bildirərək Ədliyyə Nazirliyini, Prokurorluğu, İcra qurumlarını, Vergi və Miqrasiya xidmətlərini Aqbar Ghorbani barəsində tədbir görməyə çağırır.

Bakunews.az olaraq müraciətdə qeyd olunan faktların hüquqi araşdırmaya cəlb olunması üçün aidiyyəti qurumların məsələyə dərhal reaksiya verməsini zəruri sayırıq. Belə hallar xarici vətəndaşların ölkəmizdəki hüquqi sistemə və investisiya mühitinə etimadına xələl gətirə bilər.