Beynəlmiləlçi Əlil Döyüşçülər Fondunda qalmaqal: Fond sədr müavini təşkilatdan istefa verdi
Bakunews.az xəbər verir ki, Beynəlmiləlçi Əlil Döyüşçülər Fondunun Yasamal rayon təşkilatının sədr müavini Məhərrəmov Elşən Rabil oğlu vəzifəsindən istefa verdiyini açıqlayıb.
Elşən Məhərrəmov bəyanatında bildirib ki, təşkilatdan ayrılmasının əsas səbəbi Fondun rəhbəri Sərraf Orucovun davranışlarıdır. Onun sözlərinə görə, Orucov rəhbərlik etdiyi vəzifədən sui-istifadə edərək sosial platformalarda qeyri-etik çıxışlarla həm Azərbaycanda fəaliyyət göstərən QHT rəhbərlərinə qarşı qarayaxma kampaniyası aparıb, həm də xarici qüvvələrin mövqeyindən çıxış edən şəxslərə dəstək verib:
“Sərraf Orucovun dövlət siyasətinə uyğun olmayan çıxışlarını gördükdə dərhal qərar verdim ki, belə bir təşkilatda fəaliyyətimi davam etdirə bilmərəm. Mən vətən uğrunda döyüşlərdə iştirak etmiş bir insanam. Biz daim bir nəfər hamı üçün, hamı bir nəfər üçün prinsipi ilə döyüşmüşük. Ancaq rəhbərliyin bu cür davranışları döyüşçü adına yaraşmır,”
– deyə Elşən Məhərrəmov bildirib.
Keçmiş döyüşçü əlavə edib ki, ömrünün çox hissəsini cəbhə bölgəsində keçirib və Azərbaycan ərazi bütövlüyü uğrunda vuruşub. Onun sözlərinə görə, bu xidmətlər fonunda rəhbər şəxslərin dövlət siyasətinə və milli maraqlara zidd mövqedə çıxış etməsi qəbuledilməzdir.
Elşən Məhərrəmov vurğulayıb ki, Sərraf Orucovun rəhbərlik etdiyi fondun fəaliyyətini qənaətbəxş hesab etmir və məhz buna görə müavinlikdən imtina edərək üzvlükdən tam şəkildə ayrılıb:
“Xalqıma daha faydalı ola biləcəyim sahələrdə xidmət etmək üçün bu qərarı vermişəm,” – deyə o bildirib.
Qeyd edək ki, Məhərrəmov istefa ərizəsini təqdim etdiyini də açıqlayıb.
Şikayət və təkliflər üçün qaynar xətt:
Əlaqə whatsapp:+994 70 402 02 85
BakuNews.az
Əlaqə whatsapp:+994 70 402 02 85
BakuNews.az
