Ana dili hər bir xalqın milli kimliyinin, mənəvi dəyərlərinin və tarixi yaddaşının əsas sütunudur. Dil yalnız ünsiyyət vasitəsi deyil, eyni zamanda xalqın düşüncə tərzini, adət-ənənələrini, folklorunu və mədəni irsini özündə yaşadan canlı bir xəzinədir”.
Bu fikirləri Vəhdət Partiyasının sədri, yazıçı-publisist Adəm İsmayıl Bakuvi Azərbaycan Yazıçılar Birliyində keçirilmiş 21 Fevral – Beynəlxalq Ana Dili Gününə həsr edilmiş toplantıda səsləndirib.

Onun sözlərinə görə, hər bir xalqın varlığını qoruyub saxlamasında, mədəniyyətini yaşatmasında və gələcək nəsillərə ötürməsində ana dilinin rolu əvəzsizdir. Bu baxımdan, Beynəlxalq Ana Dili Gününü dünya xalqlarının dil və mədəni müxtəlifliyinin qorunmasına yönəlmiş mühüm beynəlxalq təşəbbüs kimi qiymətləndirmək olar.

Partiya sədri bildirib ki, Azərbaycan dili zəngin tarixi keçmişə, dərin ədəbi ənənələrə və böyük inkişaf yoluna malik olan dillərdən biridir:

“Azərbaycan dilinin respublikamızda dövlət dili kimi qəbul edilməsi, qorunması və inkişafı istər sovet dönəmində, istərsə də müstəqillik dövründə Ümummilli Lider Heydər Əliyevin adı ilə sıx bağlıdır.

Azərbaycan dilinə dövlət dili statusunun verilməsi Ulu Öndərin xalq qarşısında ən böyük tarixi xidmətlərindən biri kimi qiymətləndirilir.

Məhz onun prinsipial mövqeyi nəticəsində 1978-ci ildə Azərbaycan SSR Konstitusiyasına Azərbaycan dilinin dövlət dili olduğunu təsbit edən maddə daxil edildi.

Həmin dövrdə belə bir qərarın qəbul olunması milli-mənəvi dəyərlərin qorunması baxımından mühüm və cəsarətli addım idi”.

Adəm İsmayıl Bakuvi qeyd edib ki, müstəqillik dövründə ana dilinin hüquqi statusu daha da möhkəmləndirilib.

Belə ki, 1995-ci il noyabrın 12-də ümumxalq səsverməsi yolu ilə qəbul olunmuş Azərbaycan Respublikasının Konstitusiyasının 21-ci maddəsində Azərbaycanın dövlət dilinin Azərbaycan dili olması öz əksini tapıb.

Bu müddəa dövlətçilik tariximizdə mühüm hüquqi əsas yaradıb və dilimizin inkişafı üçün yeni mərhələnin başlanğıcını qoyub.

Həmçinin, Ulu Öndər Heydər Əliyevin 2001-ci il 9 avqust tarixli Fərmanına əsasən Azərbaycan Əlifbası və Azərbaycan Dili Günü təsis edilib. Bu qərar Azərbaycan dilinin təkmilləşməsinə, latın qrafikalı əlifbanın tam tətbiqinə və dil siyasətinin sistemli şəkildə həyata keçirilməsinə geniş imkanlar açıb.

Yazıçı bildirib ki, müstəqillik illərində Heydər Əliyevin imzası ilə “Dövlət dilinin tətbiqi işinin təkmilləşdirilməsi haqqında” Sərəncam verilib, “Azərbaycan Respublikasında dövlət dili haqqında” Qanun qəbul olunub.

Partiya sədri Adəm İsmayıl Bakuvi Ulu Öndərin ana dilimizin qorunması üzrə müəyyənləşdirdiyi siyasi xəttin bu gün də uğurla davam etdirildiyini vurğulayıb:

“Bu siyasətə sadiqlik nümayiş etdirən Prezident İlham Əliyev tərəfindən də Azərbaycan dilinin inkişafı istiqamətində mühüm fərman və sərəncamlar imzalanıb.

Bunlar sırasında “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın qəbulu, “Azərbaycan dilinin elektron məkanda daha geniş istifadəsinin təmin edilməsi ilə bağlı bir sıra tədbirlər haqqında” Sərəncam, eləcə də 2018-ci ildə imzalanmış “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” Fərman xüsusi əhəmiyyət daşıyır.

Bütün bu sənədlərin qəbulu dövlət dilinin daim diqqət mərkəzində saxlanıldığını bir daha təsdiq edir. Azərbaycan dili xalqımızın milli varlığının, mənəvi dəyərlərinin və dövlətçiliyinin əsas dayağıdır.

Onun qorunması və inkişafı istiqamətində həyata keçirilən ardıcıl və məqsədyönlü siyasət Azərbaycan dövlətinin milli maraqlara əsaslanan strateji kursunun tərkib hissəsidir”.

Vəhdət Partiyasının sədri Adəm İsmayıl Bakuvi qeyd edib ki, Azərbaycan dili bu gün həm hüquqi, həm də mənəvi baxımdan möhkəm təminata malikdir və onun gələcək nəsillərə zəngin, saf və inkişaf etmiş şəkildə ötürülməsi hər bir vətəndaşın müqəddəs borcudur.

Daha sonra Azərbaycan Yazıçılar Birliyinin Bədii tərcümə və ədəbi əlaqələr mərkəzinin sədri, ədəbi tənqidçi Əsəd Cahangir ana dilinə hörmətin kiçik yaşlardan formalaşdırılmasının əhəmiyyətindən danışıb.

Tədbirdə iştirak edən şairlər Vəli Qaraçaylı və Şəfəq Sahibli uşaqlarla öz təəssüratlarını bölüşüblər.

Onlar milli ədəbiyyatımızın inkişafında mühüm rol oynamış söz ustadlarının yaradıcılığından söz açıblar.

5 nömrəli Uşaq-Gənclər İnkişaf Mərkəzinin direktoru Elza Orucova ana dilinin hər bir millətin maddi və mənəvi irsi olduğunu, dilin qorunmasının vacibliyini qeyd edib.

Mərkəzin müəllim və metodistləri Azərbaycan dilinin inkişaf yolları, dövlət dili kimi işlədilməsi və dövlətimiz tərəfindən dilimizin qorunmasına yönəlmiş siyasi tədbirlərə həsr olunmuş məruzələrlə çıxış ediblər.

Tədbirin bədii hissəsində 5 nömrəli Uşaq-Gənclər İnkişaf Mərkəzinin şagirdləri Nizami Gəncəvi, Mikayıl Müşfiq, Cəfər Cabbarlı, Xəlil Rza Ulutürk, Nəbi Xəzri, Tofiq Bayram, Nəriman Həsənzadə və digər şairlərin şeirlərini ifa ediblər.

Tədbirdə yazıçı və şairlər öz imzalı kitablarını uşaqlara təqdim edib, xatirə şəkli çəkdiriblər.