Dünya üzrə sübut olunmuş neft ehtiyatlarına görə ölkələrin yeni siyahısı açıqlanıb. Beynəlxalq analitik mərkəzlərin hesabatlarına əsasən, Azərbaycan bu siyahıda mühüm mövqeyini qoruyub saxlayır.

Oxu24.com xəbər verir ki, sübut olunmuş neft ehtiyatlarına görə ölkələrin sıralaması belədir:

Siyahının mütləq lideri Venesueladır. Bu ölkə 303 milyard bareldən çox ehtiyatla dünyanın ən böyük neft anbarı hesab olunur. Onu 267 milyard barellə Səudiyyə Ərəbistanı və 208 milyard barellə İran izləyir. İlk beşliyi isə nəhəng neft qumlarına sahib olan Kanada (163 milyard barel) və İraq (145 milyard barel) tamamlayır.

Enerji bazarının digər əsas oyunçuları olan Birləşmiş Ərəb Əmirlikləri (113 milyard barel), Küveyt (101 milyard barel) və Rusiya (80 milyard barel) müvafiq olaraq sonrakı pillələrdə qərarlaşıblar. Şimali Afrikanın lideri Liviya 48 milyard barellə 9-cu, dünyanın ən böyük neft istehlakçısı olan ABŞ isə 45 milyard barellə 10-cu sıradadır.


Afrika nəhəngi Nigeriya 37 milyard barellə 11-ci, Xəzər qonşumuz Qazaxıstan isə 30 milyard barellə 12-ci yerdədir. Onları Çin, Qətər, Braziliya, Əlcəzair və Ekvador izləyir.

Və nəhayət, Azərbaycan siyahıda 18-ci pillədə yer alır. Ölkəmiz bu göstərici ilə Avropanın ən böyük neft istehsalçısı olan Norveçi (19-cu yer) və Latın Amerikasının əsas ixracatçılarından olan Meksikanı (20-ci yer) geridə qoymağı bacarıb.


Çimnaz Telmanqızı