“Müəyyən proqramlar var ki, onlarda heç bir insan faktoru yoxdur və proqram özü təmin edir ki, hansısa müalicə prosedurları həyata keçirilsin”.
Metbuat.az xəbər verir ki, bu barədə TƏBİB-in İcraçı direktoru Vüqar Qurbanov Yeni Klinikada Yeni Robotik Reabilitasiya Mərkəzi və Hematologiya–Sümük İliyi Transplantasiyası Mərkəzinin açılışı zamanı danışıb.

O, qeyd edib ki, bu mərkəz Prezident İlham Əliyevin və Birinci vitse-prezident Mehriban Əliyevanın səhiyyəyə göstərdikləri diqqətin nəticəsidir. Məqsəd reabilitasiya mərkəzinin gündə 500, illik isə 150–200 min vətəndaşa xidmət göstərməsidir:

“Vətən müharibəsi dövründə travma almış, xəsarət almış çox sayda qazilərimiz oldu. Onların da müalicəsinin bir hissəsi reabilitasiya mərkəzlərində davam etdirilməlidir. Ölkəmizdə reabilitasiya mərkəzlərinin sayı az olduğu üçün dövlətimizin dəstəyi ilə bu şəxslər digər ölkələrdə reabilitasiya üçün göndərildi və sağlamlıqlarına qovuşdular. Amma bu cür travmaları olan qazilərimiz artıq bizim reabilitasiya mərkəzində bu xidmətləri ala biləcəklər və tam sağalacaqlar.

Bu, ölkə üçün bir yenilikdir. Buradakı avadanlıqların hər biri unikal xarakter daşıyır. Yaxın ölkələrlə müqayisə etsək, o ölkələrin bəzilərində bu avadanlıqlar yoxdur.

Vətəndaşımızın xidmətinə artıq bu gündən açıqdır və hər cür reabilitasiya, fizioterapevtik xidmətləri biz vətəndaşımıza təqdim edə biləcəyik”.