Gəncə Apellyasiya Məhkəməsində xüsusi ittiham qaydasında şikayət vermiş, tanınmış jurnalist, “Yeni Müsavat” Media Qrupun rəhbəri Rauf Abbasovun (Rauf Arifoğlu) apellyasiya şikayətin baxılıb.
Pravda.az-ın əldə etdiyi məlumata görə, hakim Sevindik Əzizovun sədrliyi ilə keçirilən prosesdə qərar elan edilib.

Qərara əsasən, "Mağara Media" adlı "YouTube" kanalında çalışan və həmin kanalı idarə edən Elşad Məmmədovun barəsində Azərbaycan Respublikası Cinayət Məcəlləsinin 147.2 və 148-ci maddələri ilə cinayət təqibi başlanması barədə Rauf Arifoğlunun xüsusi ittiham qaydasında şikayətinin məhkəmənin icraatına qəbul edilməsindən imtina olunmasına dair Qazax Rayon Məhkəməsinin 5 yanvar 2026-cı il tarixli qərarından xüsusi ittihamçı və onun nümayəndəsi tərəfindən verilmiş apellyasiya şikayəti təmin edilib. Qazax Rayon Məhkəməsinin qərarı ləğv edilib, Elşad Məmmədovun barəsində Cinayət Məcəlləsinin 147.2 və 148-ci maddələri ilə xüsusi ittiham qaydasında şikayətin məhkəmə icraatına qəbul edilib-edilməməsi məsələsinin yenidən müzakirə olunması üçün cinayət işi həmin məhkəmənin hazırlıq iclası mərhələsinə qaytarılması qərara alınıb.

Qeyd: Xüsusi ittiham qaydasında şikayət vermiş Rauf Arifoğlu şikayət ərizəsi ilə Qazax Rayon Məhkəməsinə müraciət edərək “YouTube" sosial media platformasında "Mağara Media" adlı "YouTube" kanalında onu ağır cinayətdə ittiham etməklə barəsində böhtan xarakterli məlumatları yaydığına, onu və onun ailə üzvlərini küçə söyüşləri ilə təhqir etdiyinə görə 1976-cı ildə Bakı şəhərində anadan olmuş, "Mağara Media" adlı "YouTube" kanalında çalışan və həmin kanalı idarə edən, Qazax rayonu Aşağı Əskipara kəndində qeydiyyatda olan Elşad Məmmədovun Cinayət Məcəlləsinin 147.2-ci və 148-ci maddələri ilə təqsirli bilinərək cinayət məsuliyyətinə cəlb edilməsini xahiş edib.

Qazax Rayon Məhkəməsinin qərarı ilə xüsusi ittiham qaydasında şikayəti üzrə məhkəmə baxışının keçirilməsindən və şikayətin icraata qəbul edilməsindən imtina olunub. Qərardan xüsusi ittihamçı və onun nümayəndəsi apellyasiya şikayəti verərək Qazax Rayon Məhkəməsinin həmin qərarının ləğv edilməsini, Elşad Məmmədovun barəsində Cinayət Məcəlləsinin 147.2 və 148-ci maddələri ilə verilmiş xüsusi ittiham qaydasında şikayət üzrə Elşad Məmmədovun təqsirləndirilən şəxs qismində cəlb edilərək şikayətin icraata götürülməsi barədə qərar qəbul edilməsini xahiş ediblər.

Apellyasiya şikayəti onunla əsaslandırılıb ki, Rauf Arifoğlu uzun illərdir jurnalist və ictimai xadim kimi fəaliyyət göstərir, geniş auditoriya tərəfindən tanınır və ictimai nüfuza malikdir: “Elşad Məmmədov hazırda İsveçrədə mühacirətdə yaşayır və “Mağara Media” adlı “YouTube” kanalı vasitəsilə Azərbaycan ictimaiyyətinə yönəlik kütləvi yayımlar həyata keçirir. Həmin kanalın auditoriyası böyükdür və 271 mindən artıq abunəçisi mövcuddur. Nəticə etibarilə cavabdehin yayımladığı hər bir video geniş kütlə tərəfindən izlənilir və ictimai rəyə təsir etmək gücünə malik olur. Elşad Məmmədov “YouTube” sosial media platformasında “Mağara Media” kanalında öz adından Rauf Abbasovun ünvanına həqiqətə uyğun olmayan ifadələr işlədərək, onun və ailə üzvlərinin ünvanına küçə söyüşləri işlədərək onu təhqir etmiş və onu ağır cinayətdə ittiham edərək ona qarşı böhtan atmışdır. Elşad Məmmədovun təhqiramiz ifadələri tam şəkildə məhkəməyə təqdim edilən elektron daşıyıcıda mövcuddur. Elşad Məmmədovun davranışları təkcə Rauf Abbasova yönəlmiş şəxsi hücumlarla məhdudlaşmır”.