Abşeron rayonu, Masazır qəsəbəsinin sakinləri tərəfindən BNTV.az redaksiyasına daxil olan müraciətdə son günlər yağan intensiv yağışlara baxmayaraq, ərazidə içməli su təminatında ciddi problemlərin yarandığı bildirilir. Sakinlərin sözlərinə görə, artıq 3 gündən çoxdur suyun verilməsi məhdudlaşıb və ya tam dayandırılıb.

Müraciətdə qeyd olunur ki, əhali gündəlik tələbatını qarşılamaq üçün mağazalardan su almağa məcbur qalıb. Bu isə xüsusilə aztəminatlı ailələr üçün əlavə maliyyə yükü yaradır. “Gündəlik istifadə üçün suyu pulla almaq məcburiyyətindəyik. Bu vəziyyət uzun müddət davam edə bilməz”, – deyə sakinlər bildirirlər.

Məsələ ilə bağlı “Azərsu” ASC-nin qaynar xətti ilə əlaqə saxlayan vətəndaşlara qurum tərəfindən suyun fasilələrlə verildiyi bildirilib. Lakin sakinlər iddia edir ki, bu fasilələr əsasən gecə saat 03:00-dan 05:00-a qədər olan dövrü əhatə edir ki, bu da su ehtiyatı toplamaq baxımından əlverişli hesab edilmir.

“Su verilir deyilir, amma o saatlarda insanların böyük əksəriyyəti istirahətdə olur. Bu isə problemi faktiki olaraq həll etmir”, – deyə şikayətdə vurğulanır.

Məsələ ilə bağlı daha əvvəl mətbuatda yayımlanan materiallarda isə “Azərsu” ASC-nin sabiq rəhbəri Qorxmaz Hüseynov dövründə həyata keçirilən bəzi layihələr və maliyyə xərcləri ilə bağlı müxtəlif iddiaların yer aldığı məlumdur. Həmin iddialarda ayrılan vəsaitlərin effektivliyi və infrastrukturun real vəziyyəti ilə bağlı suallar səsləndirilmişdi.

Hazırda quruma rəhbərlik edən Zaur Mikayılov dövründə isə sakinlər mövcud problemlərin daha operativ və dayanıqlı şəkildə həllini gözlədiklərini bildirirlər. Onların sözlərinə görə, əsas gözlənti su təminatının sabitləşdirilməsi və xidmətin insanların gündəlik ehtiyaclarına uyğun təşkili ilə bağlıdır.

Mütəxəssislər qeyd edirlər ki, intensiv yağıntılar bəzi hallarda su təchizatı sistemlərinə təsir göstərə, texniki fasilələrə səbəb ola bilər. Bununla belə, belə hallarda əhalinin əvvəlcədən məlumatlandırılması və alternativ təminat mexanizmlərinin qurulması vacib hesab olunur.

Hazırkı vəziyyət Masazır qəsəbəsində sosial narazılıq doğurmaqla yanaşı, kommunal xidmətlərin təşkili ilə bağlı suallar da yaradır. Sakinlər aidiyyəti qurumlardan problemin qısa müddətdə aradan qaldırılmasını və gələcəkdə oxşar halların təkrarlanmaması üçün effektiv tədbirlərin görülməsini tələb edirlər.

Məsələ ilə bağlı “Azərsu” ASC-nin rəsmi mövqeyini dərc etməyə hazırıq.