"LION CENTRE" MMC Dövlət Gömrük Komitəsinin fəaliyyəti ilə bağlı iddialarını əks etdirən geniş mətbuat açıqlaması yayıb.

Şirkətin direktoru Ramil Aslanovun imzası ilə yayılan açıqlamada 2025-ci ildə həyata keçirilmiş idxal əməliyyatlarının gömrük rəsmiləşdirilməsi zamanı qanunvericiliyin pozulduğu iddia olunur.
Şirkət bildirir ki, məsələ ilə bağlı Dövlət Gömrük Komitəsinə və digər aidiyyəti dövlət qurumlarına dəfələrlə müraciət olunmasına baxmayaraq, təqdim edilən hüquqi arqumentlər mahiyyəti üzrə araşdırılmayıb, yalnız formal və şablon cavablarla kifayətlənilib.
Mətbuat açıqlamasında qeyd edilir ki, Gömrük Məcəlləsinin 221-ci maddəsinə əsasən, gömrük dəyərinə düzəliş edilməsi üçün bildiriş bəyannamənin təqdim edilməsindən sonra qanunla müəyyən edilmiş müddətdə təqdim olunmalıdır. Lakin şirkətin iddiasına görə, 16 avqust 2025-ci il tarixli gömrük bəyannaməsi üzrə bildiriş beş gün sonra təqdim edilib və bununla da qanunvericiliyin tələbi pozulub.
"LION CENTRE" MMC daha sonra iddia edir ki, Dövlət Gömrük Komitəsinin 22 iyul 2026-cı il tarixli cavab məktubunda 2025-ci ildə baş vermiş hadisələrə 2026-cı ildə qüvvəyə minmiş qanun dəyişiklikləri tətbiq edilərək hüquqi qiymət verilib. Şirkət bunu hüquqi müəyyənlik prinsipinin və qanunların geriyə şamil edilməməsi prinsipinin pozulması kimi qiymətləndirir.
Açıqlamada həmçinin bildirilir ki, eyni xarakterli gömrük bəyannamələri üzrə müxtəlif qərarların qəbul edilməsi, təqdim olunan hüquqi arqumentlərin cavabsız saxlanılması və qanun pozuntularının araşdırılmaması sahibkarlarda ciddi narahatlıq yaradır.
Şirkət hesab edir ki, məsələ artıq təkcə bir müəssisənin problemi deyil, gömrük inzibatçılığında şəffaflıq, vəzifəli şəxslərin məsuliyyəti və qanunun aliliyinin təmin olunması baxımından ictimai əhəmiyyət daşıyır.
"LION CENTRE" MMC dövlət başçısına ünvanladığı müraciətdə 2025-ci ildə baş vermiş gömrük rəsmiləşdirilməsi prosesinə həmin dövrdə qüvvədə olmuş qanunvericilik əsasında yenidən hüquqi qiymət verilməsini, bildiriş müddətlərinin pozulmasının araşdırılmasını, ziddiyyətli qərarların hüquqi qiymətləndirilməsini və təqdim olunmuş hüquqi arqumentlər üzrə əsaslandırılmış yazılı cavab verilməsini xahiş etdiyini bildirib.
Qeyd edək ki, yazıda yer alan bütün iddialar "LION CENTRE" MMC-nin mövqeyini əks etdirir. Məsələ ilə bağlı Dövlət Gömrük Komitəsinin rəsmi mövqeyi dərc olunacağı təqdirdə, BNTV.az qarşı tərəfin açıqlamasını da olduğu kimi dərc etməyə hazırdır.