Son zamanlar sosial şəbəkələrdə və ictimaiyyətdə ciddi narahatlıq doğuran bir məhkəmə işi gündəmi zəbt edib. Belə ki, özünü qazi kimi təqdim edən, lakin heç bir rəsmi statusa malik olmayan Xəyal Məmmədovun adı növbəti dəfə dələduzluq iddiaları ilə hallanır.

İddialara görə, Xəyal Məmmədov məlahət adlı qadını aldadaraq ona 12.000 manatlıq torpaq sahəsinə dair çıxarış vəd edib və bu məqsədlə həmin vəsaiti mənimsəyib. Bu hadisə ilə bağlı iş araşdırılaraq Cinayət Məcəlləsinin 178-ci maddəsi – yəni dələduzluq – ilə Xətai Rayon Məhkəməsinə göndərilib. Lakin artıq beş dəfədir ki, məhkəmə iclasları təxirə salınır və bu da ictimaiyyət arasında haqlı suallar doğurur.

Məlumata görə, Xəyal Məmmədov məhkəmə proseslərinə qəsdən qatılmır. O, hər dəfə saxta tibbi bəhanələrlə – guya psixiatrik müalicə aldığına dair dəlillərlə məhkəməni təxirə saldırır. Xüsusilə Məştağa Psixiatriya Xəstəxanası ilə əlbir olaraq saxta reabilitasiya keçdiyini bildirərək prosesin gedişinə mane olduğu iddia olunur. Məhkəmə zalında isə hakimin özü də bu iddiaları sübut edən hər hansı sənədin təqdim edilmədiyini etiraf edib.

Bu hal Cinayət Prosessual Məcəlləsinin 158-160-cı maddələri çərçivəsində məcburi gətirilmə və ya həbs tədbirinin seçilməsinə hüquqi əsas yaratsa da, Xəyal Məmmədov barəsində indiyədək heç bir hüquqi tədbir görülməyib.


İş hazırda hakim Aygün Həsənovanın icraatındadır. Məlumatlara əsasən, məhkəmə prosesi bilərəkdən və ya səhlənkarlıqla ləngidilir və bu, artıq ədalət mühakiməsinə maneə kimi qiymətləndirilə bilər. Qanunvericiliyə əsasən, məhkəməyə çağırışdan yayınan və ya prosesi süni ləngidən şəxslərlə bağlı həbs və ya məcburi gətirilmə tədbirləri seçilə bilər.


Etibarlı mənbələr bildirir ki, Xəyal Məmmədovun atasının qohumu olan və Hacıqabul rayonunda prokuror vəzifəsində çalışan L. Hüseynovanın dəstəyilə o, məsuliyyətdən yayınmağa çalışır. Hətta yaxın ətrafı ilə bu barədə açıq şəkildə danışdığı da deyilir.

Hadisənin başqa bir diqqətçəkən tərəfi də Xəyal Məmmədovun prosesdə şahid qismində çıxış etməli olan Cahid adlı şəxsi saxta şikayətlə Bərdə Rayon Polis Şöbəsinə şikayət edərək onun həbsinə nail olmağa çalışmasıdır. Lakin ittiham əsassız olduğu üçün şahid sərbəst buraxılıb.


Ortaya çıxan sual budur: Əgər təqsirləndirilən şəxs açıq şəkildə istintaqa və məhkəməyə mane olur, şahidlərə təzyiq göstərməyə çalışırsa, niyə onun barəsində hələ də məhkəmə qərarı çıxarılmır? Qanun pozuntuları bu qədər açıq olduğu halda, hüquqi tədbirsizlik yalnız hüquq sisteminə olan ictimai etimadı zədələyir.


Bu cür hallar bir daha göstərir ki, ədalət yalnız məhkəmə zalında yox, hüququn tətbiqi ilə təmin olunur. Zərərçəkmiş və ictimaiyyət haqlı olaraq soruşur: saxta “qazi” statusundan istifadə edən, dələduzluq və yalan bəyanatlarla prosesi ləngidən şəxslə bağlı nə vaxt hüquqi addım atılacaq?

Baş Prokurorluq, Ədliyyə Nazirliyi və məhkəmə nəzarəti orqanları bu prosesi nəzarətə götürməli, cəmiyyətin ədalət gözləntisinə cavab verilməlidir.

Məsələni diqqətdə saxlayacağıq.

QÖNÇƏ MAHALOVA